อปฺปฏิวิภตฺตโภคีติ เนว อามิสํ ปฏิวิภชิตฺวา ภุญฺชติ น ปุคฺคลํ ฯ โย หิ เอตฺตกํ ปเรสํ ทสฺสามิ เอตฺตกํ อตฺตนา ภุญฺชิสฺสามิ เอตฺตกํ วา อสุกสฺส จ อสุกสฺส จ ทสฺสามิ เอตฺตกํ อตฺตนา ภุญฺชิสฺสามีติ วิภชิตฺวา ภุญฺชติ อยํ ปฏิวิภตฺตโภคี นาม ฯ อยํ ปน เอวํ อกตฺวา อาภตํ ปิณฺฑปาตํ เถราสนโต ปฏฺฐาย ทตฺวา คหิตาวเสสํ ภุญฺชติ ฯ สีลวนฺเตหีติ วจนโต ทุสฺสีลสฺส อทาตุํปิ วฏฺฏติ ฯ สาราณียธมฺมปูรเกน ปน สพฺเพสํ ทาตพฺพเมวาติ วุตฺตํ ฯ คิลานคิลานุปฏฺฐากอาคนฺตุกคมิกจีวรกมฺมาทิปสุตานํ วิเจยฺยทานํปิ วฏฺฏติ ฯ น หิ เอเต วิจินิตฺวา เทนฺเตน ปุคฺคลวิภาโค กโต โหติ ฯ อีทิสานํ หิ กิจฺฉลาภตฺตา วิเสโส กาตพฺโพเยวาติ อยํ กโรติ ฯ อขณฺฑานีติอาทีสุ ยสฺส สตฺตสุ อาปตฺติกฺขนฺเธสุ อาทิมฺหิ วา อนฺเต วา สิกฺขาปทํ ภินนํ โหติ ตสฺส สีลํ ปริยนฺเต ฉินฺนสาฏโก วิย ขณฺฑํ นาม ฯ ยสฺส ปน เวมชฺเฌ ภินฺนํ ตสฺส มชฺเฌ ฉิทฺทสาฏโก วิย ฉิทฺทํ นาม โหติ ฯ ยสฺส ปฏิปาฏิยา เทฺว ตีณิ ภินฺนานิ ตสฺส ปิฏฺฐิยํ วา กุจฺฉิยํ วา อุฏฺฐิเตน วิสภาควณฺเณน กาฬรตฺตาทีนํ อญฺญตรสรีรวณฺณา คาวี วิย สพลํ นาม โหติ ฯ ยสฺส อนฺตรนฺตรา ภินฺนานิ ตสฺส อนฺตรนฺตรา วิสภาควณฺณพินฺทุวิจิตฺรา คาวี วิย กมฺมาสนฺนาม โหติ ฯ ยสฺส ปน สพฺเพน สพฺพํ อภินฺนานิ สีลานิ ตสฺส ตานิ สีลานิ อขณฺฑานิ อจฺฉิทฺทานิ อสพลานิ อกมฺมาสานิ นาม โหนฺติ ฯ ตานิ ปเนตานิ ภุชิสฺสภาวกรณโต ภุชิสฺสานิ วิญฺญูหิ ปสตฺถตฺตา วิญฺญูปสตฺถานิ ตณฺหาทิฏฺฐีหิ อปรามฏฺฐตฺตา อปรามฏฺฐานิ อุปจารสมาธึ วา อปฺปนาสมาธึ วา สํวตฺตยนฺตีติ สมาธิสํวตฺตนิกานีติ วุจฺจนฺติ ฯ สีลสามญฺญคโต วิหรตีติ เตสุ เตสุ ทิสาภาเคสุ วิหรนฺเตหิ กลฺยาณสีเลหิ ภิกฺขูหิ สทฺธึ สมานภาวูปคตสีโล วิหรติ ฯ ยายํ ทิฏฺฐีติ มคฺคสมฺปยุตฺตา สมฺมาทิฏฺฐิ ฯ อริยาติ นิทฺโทสา ฯ นิยฺยาตีติ นิยฺยานิกา ฯ ตกฺกรสฺสาติ โย ตถาการี โหติ ฯ ทุกฺขกฺขยายาติ สพฺพทุกฺขสฺส ขยตฺถํ ฯ เสสํ ยาว สมถเภทปริโยสานา อุตฺตานตฺถเมว ฯ

กติปุจฺฉาวารวณฺณนา นิฏฺฐิตา ฯ