{๓๒๒} ทุเกสุ ฯ สจิตฺตกา อาปตฺติ สญฺญาวิโมกฺขา อจิตฺตกา โนสญฺญาวิโมกฺขา ฯ ลทฺธสมาปตฺติกสฺส อาปตฺติ นาม ภูตาโรจนาปตฺติ ฯ อลทฺธสมาปตฺติกสฺส อภูตาโรจนาปตฺติ ฯ สทฺธมฺมปฏิสญฺญุตฺตา นาม ปทโสธมฺมาทิกา ฯ อสทฺธมฺมปฏิสญฺญุตฺตา นาม ทุฏฺฐุลฺลวาจาปตฺติ ฯ สปริกฺขารปฏิสญฺญุตฺตา นาม นิสฺสคฺคิยวตฺถุโน อนิสฺสชฺชิตฺวาปริโภเค ปตฺตจีวรานํนิทหเน กิลิฏฺฐจีวรานํอโธวเน มลคฺคหิตสฺส ปตฺตสฺส อปจเนติ เอวํ อยุตฺตปริโภเค อาปตฺติ ฯ ปรปริกฺขารปฏิสญฺญุตฺตา นาม สงฺฆิกมญฺจปีฐาทีนํ อชฺโฌกาเส สนฺถรณอนาปุจฺฉาคมนาทีสุ อาปชฺชิตพฺพา อาปตฺติ ฯ สปุคฺคล- ปฏิสญฺญุตฺตา นาม มุทุปิฏฺฐิกสฺส ลมฺพิสฺส อุรุนา องฺคชาตํ ปีเฬนฺตสฺสาติอาทินา นเยน วุตฺตาปตฺติ ฯ ปรปุคฺคลปฏิสญฺญุตฺตา นาม เมถุนธมฺม กายสํสคฺค ปหารทานาทีสุ วุตฺตาปตฺติ ฯ สิขิรณีสีติ สจฺจํ ภณนฺโต ครุกํ อาปชฺชติ ฯ สมฺปชานมุสาวาเท ปาจิตฺติยนฺติ มุสา ภณนฺโต ลหุกํ ฯ อภูตาโรจเน มุสา ภณนฺโต ครุกํ ฯ ภูตาโรจเน สจฺจํ ภณนฺโต ลหุกํ ฯ สงฺฆกมฺมํ วคฺคํ กริสฺสามีติ อนฺโตสีมาย เอกมนฺเต นิสีทนฺโต ภูมิคโต อาปชฺชติ นาม ฯ สเจ ปน องฺคุลิมตฺตํปิ อากาเส ติฏฺเฐยฺย น อาปชฺเชยฺย ฯ เตน วุตฺตํ โน เวหาสคโตติ ฯ เวหาสกุฏิยา อาหจฺจ ปาทกํ มญฺจํ วา ปีฐํ วา อภินิสีทนฺโต เวหาสคโต อาปชฺชติ นาม ฯ สเจ ปน ตํ ภูมิยํ ปญฺญาเปตฺวา นิปชฺเชยฺย น อาปชฺเชยฺย ฯ เตน วุตฺตํ โน ภูมิคโตติ ฯ คมิโย คมิยวตฺตํ อปูเรตฺวา คจฺฉนฺโต นิกฺขมนฺโต อาปชฺชติ นาม โน ปวิสนฺโต ฯ อาคนฺตุโก อาคนฺตุกวตฺตํ อปูเรตฺวา สฉตฺตุปาหโน ปวิสนฺโต ปวิสนฺโต อาปชฺชติ นาม โน นิกฺขมนฺโต ฯ อาทิยนฺโต อาปชฺชติ นาม ภิกฺขุนี อติคมฺภีรํ อุทกสุทฺธิกํ อาทิยมานา ฯ ทุพฺพณฺณกรณํ อนาทิยิตฺวา จีวรํ ปริภุญฺชนฺโต ปน อนาทิยนฺโต อาปชฺชติ นาม ฯ มูควตฺตาทีนิ ติตฺถิยวตฺตานิ สมาทิยนฺโต สมาทิยนฺโต อาปชฺชติ นาม ฯ ปาริวาสิกาทโย ปน ตชฺชนียาทิกมฺมกตา วา อตฺตโน วตฺตํ อสมาทิยนฺตา อสมาทิยนฺตา อาปชฺชนฺติ นาม ฯ เต สนฺธาย วุตฺตํ อตฺถาปตฺติ น สมาทิยนฺโต อาปชฺชตีติ ฯ อญฺญาติกาย ภิกฺขุนิยา จีวรํ สิพฺเพนฺโต เวชฺชกมฺมภณฺฑาคาริกกมฺม จิตฺตกมฺมานิ วา กโรนฺโต กโรนฺโต อาปชฺชติ นาม ฯ อุปชฺฌายวตฺตาทีนิ อกโรนฺโต อกโรนฺโต อาปชฺชติ นาม ฯ อญฺญาติกาย ภิกฺขุนิยา จีวรํ ททมาโน เทนฺโต อาปชฺชติ นาม ฯ สทฺธิวิหาริกอนฺเตวาสิกานํ จีวราทีนิ อเทนฺโต อเทนฺโต อาปชฺชติ นาม ฯ อญฺญาติกาย ภิกฺขุนิยา จีวรํ คณฺหนฺโต ปฏิคฺคณฺหนฺโต อาปชฺชติ นาม ฯ น ภิกฺขเว โอวาโท น คเหตพฺโพติ วจนโต โอวาทํ น คณฺหนฺโต น ปฏิคฺคณฺหนฺโต อาปชฺชติ นาม ฯ นิสฺสคฺคิยวตฺถุํ อนิสฺสชฺชิตฺวา ปริภุญฺชนฺโต ปริโภเคน อาปชฺชติ นาม ฯ ปญฺจาหิกํ สงฺฆาฏิวารํ อติกฺกามยมาโน อปริโภเคน อาปชฺชติ นาม ฯ สหาคารเสยฺยํ รตฺตึ อาปชฺชติ นาม ฯ ทฺวารํ อสํวริตฺวา ปฏิสลฺลียนฺโต ทิวา อาปชฺชติ นาม โน รตฺตึ ฯ เอกรตฺตฉารตฺตสตฺตาหทสาหมาสาติกฺกเมสุ วุตฺตํ อาปตฺตึ อาปชฺชนฺโต อรุณุคฺเค อาปชฺชติ นาม ฯ ปวาเรตฺวา ภุญฺชนฺโต น อรุณุคฺเค อาปชฺชติ นาม ฯ ภูตคามญฺเจว องฺคชาตญฺจ ฉินฺทนฺโต ฉินฺทนฺโต อาปชฺชติ นาม ฯ เกเส จ นเข จ น ฉินฺทนฺโต น ฉินฺทนฺโต อาปชฺชติ นาม ฯ อาปตฺตึ ฉาเทนฺโต ฉาเทนฺโต อาปชฺชติ นาม ฯ ติเณน วา ปณฺเณน วา ปฏิจฺฉาเทตฺวา อาคนฺตพฺพํ น เตฺวว นคฺเคน อาคนฺตพฺพํ โย อาคจฺเฉยฺย อาปตฺติ ทุกฺกฏสฺสาติ อิมํ ปน อาปตฺตึ น ฉาเทนฺโต อาปชฺชติ นาม ฯ กุสจีราทีนิ ธาเรนฺโต ธาเรนฺโต อาปชฺชติ นาม ฯ อยํ เต ภิกฺขุ ปตฺโต ยาว เภทนาย ธาเรตพฺโพติ อิมํ อาปตฺตึ น ธาเรนฺโต อาปชฺชติ นาม ฯ