อตฺตนา วา อตฺตานํ นานาสํวาสกํ กโรตีติ เอกสีมายํ ทฺวีสุ สงฺเฆสุ นิสินฺเนสุ เอกสฺมึ ปกฺเข นิสีทิตฺวา ปรปกฺขสฺส ลทฺธึ คณฺหนฺโต ยสฺมึ ปกฺเข นิสินฺโน เตสํ อตฺตนา วา อตฺตานํ นานาสํวาสกํ กโรติ นาม ฯ เยสํ สนฺติเก นิสินฺโน เตสํ คณปูรโก หุตฺวาปิ กมฺมํ โกเปติ อิตเรสํ หตฺถปาสํ อนาคตตฺตา ฯ สมานสํวาสเกปิ เอเสว นโย ฯ เยสํ หิ โส ลทฺธึ โรเจติ เตสํ สมานสํวาสโก โหติ ฯ อิตเรสํ นานาสํวาสโก ฯ

สตฺต อาปตฺติโย สตฺต อาปตฺติกฺขนฺธาติ อาปชฺชิตพฺพโต อาปตฺติโย ราสตฺเถน ขนฺธาติ เอวํ เทฺวเยว นามานิ โหนฺตีติ นามวเสน ทุกํ ทสฺสิตํ ฯ กมฺเมน วา สลากคาเหน วาติ เอตฺถ อุทฺเทโส เจว กมฺมญฺจ เอกํ ฯ โวหาโร เจว อนุสฺสาวนา จ สลากคาโห จ เอกํ ฯ โวหารานุสฺสาวนสลากคาหา ปุพฺพภาคา ฯ กมฺมญฺเจว อุทฺเทโส จ ปมาณํ ฯ

อทฺธานหีโน นาม โอนวีสติวสฺโส ฯ องฺคหีโน นาม หตฺถจฺฉินฺนาทิเภโท ฯ วตฺถุวิปนฺโน นาม ปณฺฑโก ติรจฺฉานคโต อุภโตพฺยญฺชนโก จ ฯ อวเสสา เถยฺยสํวาสกาทโย อฏฺฐ อภพฺพปุคฺคลา กรณทุกฺกฏกา นาม ฯ ทุกฺกฏกิริยา ทุกฺกฏกมฺมา ฯ อิมสฺมึเยว อตฺตภาเว กเตน อตฺตโน กมฺเมน อภพฺพฏฺฐานํ ปตฺตาติ อตฺโถ ฯ อปริปูโร นาม อปริปุณฺณปตฺตจีวโร ฯ โน จ ยาจติ นาม อุปสมฺปทํ น ยาจติ ฯ อลชฺชิสฺส จ พาลสฺส จาติ อลชฺชี สเจปิ ติปิฏโก โหติ พาโล จ สเจปิ สฏฺฐิวสฺโส โหติ อุโภปิ นิสฺสาย น วตฺตพฺพํ ฯ พาลสฺส จ ลชฺชิสฺส จ ยาจตีติ เอตฺถ ฯ พาลสฺส ตฺวํ นิสฺสยํ คณฺหาหีติ อาณายปิ นิสฺสโย ทาตพฺโพ ฯ ลชฺชิสฺส ปน ยาจนฺตสฺเสว ฯ สาติสารนฺติ สโทสํ ยํ อชฺฌาจรนฺโต อาปตฺตึ อาปชฺชติ ฯ

กาเยน ปฏิกฺโกสนา นาม หตฺถวิการาทีหิ ปฏิกฺโกสนา ฯ กาเยน วา ปฏิชานาตีติ หตฺถวิการาทีหิ ปฏิชานาติ ฯ อุปฆาติกา นาม อุปฆาตา ฯ สิกฺขูปฆาติกา นาม สิกฺขูปฆาโต ฯ โภคูปฆาติกา นาม ปริโภคูปฆาโต ฯ ตตฺถ ติสฺโส สิกฺขา อสิกฺขโต สิกฺขูปฆาติกา เวทิตพฺพา ฯ สงฺฆิกํ วา ปุคฺคลิกํ วา ทุปปริโภคํ ภุญฺชโต โภคูปฆาติกา เวทิตพฺพา ฯ