เอตํ หิ อฏฺฐงฺคิกมาหุโปสถํ

พุทฺเธน ทุกฺขนฺตคุนา ปกาสิตนฺติ

เอวํ วุตฺตานิ อฏฺฐ ฯ อฏฺฐ ทูเตยฺยงฺคานีติ อิธ ภิกฺขเว ภิกฺขุ โสตา จ โหติ สาเวตา จาติอาทินา นเยน สงฺฆเภทเก วุตฺตานิ ฯ ติตฺถิยวตฺตานิ มหาขนฺธเก นิทฺทิฏฺฐานิ ฯ อนติริตฺตา จ อติริตฺตา จ ปวารณสิกฺขาปเท นิทฺทิฏฺฐา ฯ อฏฺฐนฺนํ ปจฺจุฏฐาตพฺพนฺติ ภตฺตคฺเค วุฑฺฒภิกฺขุนีนํ อาสนมฺปิ ตาสํเยว ทาตพฺพํ ฯ อุปาสิกาติ วิสาขา ฯ อฏฺฐานิสํสา วินยธเรติ ปญฺจเก วุตฺเตสุ ปญฺจสุ ตสฺสาเธยฺโย อุโปสโถ ปวารณา สงฺฆกมฺมนฺติ อิเม ตโย ปกฺขิปิตฺวา อฏฺฐ เวทิตพฺพา ฯ อฏฺฐ ปรมานีติ ปุพฺเพ วุตฺตปรมาเนว อฏฺฐกวเสน โยเชตฺวา เวทิตพฺพานิ ฯ อฏฺฐสุ ธมฺเมสุ สมฺมาวตฺติตพฺพนฺติ น ปกตตฺตสฺส ภิกฺขุโน อุโปสโถ ฐเปตพฺโพ น ปวารณา ฐเปตพฺพาติอาทินา นเยน สมถกฺขนฺธเก นิทฺทิฏฺเฐสุ อฏฺฐสุ ฯ เสสํ สพฺพตฺถ อุตฺตานเมวาติ ฯ

อฏฺฐกวณฺณนา นิฏฺฐิตา ฯ