ปฏิญฺญานุสนฺธิเตน การเยติ เอตฺถ อนุสนฺธิตนฺติ กถานุสนฺธิ วุจฺจติ ตสฺมา ปฏิญฺญานุสนฺธินา การเย กถานุสนฺธึ สลฺลกฺเขตฺวา ปฏิญฺญาย

การเยติ อตฺโถ ฯ อถวา ฯ ปฏิญฺญาย จ อนุสนฺธิเตน จ การเย ลชฺชิปฏิญฺญาย การเย อลชฺชิวตฺตานุสนฺธินาติ อตฺโถ ฯ ตสฺมา เอวํ ปฏิญฺญา ลชฺชีสูติ คาถมาห ฯ ตตฺถ วตฺตานุสนฺธิเตน การเยติ วตฺตานุสนฺธินา การเย ยา อสฺส วตฺเตน สทฺธึ ปฏิญฺญา สนฺธิยติ ตาย ปฏิญฺญาย การเยติ อตฺโถ ฯ สญฺจิจฺจาติ ชานนฺโต อาปชฺชติ ฯ ปริคูหตีติ นิคูหติ น เทเสติ น วุฏฺฐาติ ฯ สจฺจํ อหํปิ ชานามีติ ยํ ตุมฺเหหิ วุตฺตํ ตํ สจฺจํ อหํปิ นํ เอวเมว ชานามิ ฯ อญฺญญฺจ ตาหนฺติ อญฺญํ จ ตํ อหํ ปุจฺฉามิ ฯ

ปุพฺพาปรํ น ชานาตีติ ปุเร กถิตญฺจ ปจฺฉา กถิตญฺจ น ชานาติ ฯ อโกวิโทติ ตสฺมึ ปุพฺพาปเร อกุสโล ฯ อนุสนฺธิวจนปถํ น ชานาตีติ กถานุสนฺธิวจนํ วินิจฺฉยานุสนฺธิวจนํ จ น ชานาติ ฯ สีลวิปตฺติยา โจเทตีติ ทฺวีหิ อาปตฺติกฺขนฺเธหิ โจเทติ ฯ อาจารทิฏฺฐิยาติ อาจารวิปตฺติยา เจว ทิฏฺฐิวิปตฺติยา จ ฯ อาจารวิปตฺติยา โจเทนฺโต ปญฺจหาปตฺติกฺขนฺเธหิ โจเทติ ทิฏฺฐิวิปตฺติยา โจเทนฺโต มิจฺฉาทิฏฺฐิยา เจว อนฺตคาหิกทิฏฺฐิยา จ โจเทติ ฯ อาชีเวนปิ โจเทตีติ อาชีวเหตุ ปญฺญตฺเตหิ ฉหิ สิกฺขาปเทหิ โจเทติ ฯ เสสํ สพฺพตฺถ อุตฺตานเมวาติ ฯ

ทุติยคาถาสงฺคณิกวณฺณนา นิฏฺฐิตา ฯ