{๔๑๑} วตฺถุวิปนฺนญฺจ โหตีติ อกปฺปิยทุสฺสํ โหติ ฯ กาลวิปนฺนํ นาม อชฺช ทายเกหิ ทินฺนํ เสฺว สงฺโฆ กฐินตฺถารกสฺส เทติ ฯ กรณวิปนฺนํ นาม ตทเหว ฉินฺทิตฺวา อกตํ ฯ

{๔๑๒} กฐินํ ชานิตพฺพนฺติอาทิปุจฺฉาย วิสฺสชฺชเน ฯ เตสํเยว ธมฺมานนฺติ เยสุ รูปาทีสุ ธมฺเมสุ สติ กฐินํ นาม โหติ เตสํ สโมธานมิสฺสีภาโว ฯ นามํ นามกมฺมนฺติอาทินา ปน กฐินนฺติ อิทํ พหูสุ ธมฺเมสุ นามมตฺตํ น ปรมตฺถโต เอโก ธมฺโม อตฺถีติ ทสฺเสติ ฯ จตุวีสติยา อากาเรหีติ น อุลฺลิขิตมตฺเตนาติอาทีหิ ปุพฺเพ วุตฺตการเณหิ ฯ สตฺตรสหิ อากาเรหีติ อาหเตน อตฺถตํ โหติ กฐินนฺติอาทีหิ ปุพฺเพ วุตฺตการเณหิ ฯ นิมิตฺตกมฺมาทีสุ ยํ วตฺตพฺพํ ตํ สพฺพํ กฐินกฺขนฺธกวณฺณนายํ วุตฺตํ ฯ

{๔๑๖} เอกุปฺปาทา เอกนิโรธาติ อุปฺปชฺชมานาปิ เอกโต อุปฺปชฺชนฺติ นิรุชฺฌมานาปิ เอกโต นิรุชฺฌนฺติ ฯ เอกุปฺปาทา นานานิโรธาติ อุปฺปชฺชมานา เอกโต อุปฺปชฺชนฺติ นิรุชฺฌมานา นานา นิรุชฺฌนฺติ ฯ กึ วุตฺตํ โหติ ฯ สพฺเพปิ อตฺถาเรน สทฺธึ เอกโต อุปฺปชฺชนฺติ ฯ อตฺถาเร หิ สติ อุทฺธาโร นาม โหติ ฯ นิรุชฺฌมานา ปเนตฺถ ปุริมา เทฺว อตฺถาเรน สทฺธึ เอกโต นิรุชฺฌนฺติ อุทฺธารภาวํ ปาปุณนฺติ ฯ อตฺถารสฺส หิ นิโรโธ เอเตสญฺจ อุทฺธารภาโว เอกกฺขเณ โหติ ฯ อิตเร นานา นิรุชฺฌนฺติ ฯ เตสุปิ อุทฺธารภาวํ ปตฺเตสุ อตฺถาโร ติฏฺฐติเยว ฯ เสสํ สพฺพตฺถ อุตฺตานเมวาติ ฯ

กฐินเภทวณฺณนา นิฏฺฐิตา ฯ