สงฺฆาทิเสสา จตุโรติ อยํ ปญฺหา อรุณุคฺเค คามนฺตรปริยาปนฺนํ นทีปารํ โอกฺกนฺตภิกฺขุนึ สนฺธาย วุตฺตา ฯ สา หิ สกคามโต ปจฺจูสสมเย นิกฺขมิตฺวา อรุณุคฺคมนกาเล วุตฺตปฺปการํ นทีปารํ โอกฺกนฺตมตฺตาว รตฺติวิปฺปวาสคามนฺตรนทีปารคณมฺหาโอหิยฺยนลกฺขเณ เอกปฺปหาเรเนว จตุโร สงฺฆาทิเสเส อาปตฺติโย อาปชฺชติ ฯ

สิยา อาปตฺติโย นานาติ อยํ ปญฺหา เอกโต อุปสมฺปนฺนา เทฺว ภิกฺขุนิโย สนฺธาย วุตฺตา ฯ ตาสุ หิ ภิกฺขูนํ สนฺติเก เอกโต อุปสมฺปนฺนาย หตฺถโต คณฺหนฺตสฺส ปาจิตฺติยํ ฯ ภิกฺขุนีนํ สนฺติเก เอกโต อุปสมฺปนฺนาย หตฺถโต คณฺหนฺตสฺส ทุกฺกฏํ ฯ จตุโร ชนา สํวิธายาติ อาจริโย จ ตโย จ อนฺเตวาสิกา ฉมาสกํ ภณฺฑํ อวหรึสุ ฯ อาจริยสฺส สาหตฺถิกา ตโย มาสกา อาณตฺติยาปิ ตโยว ตสฺมา ถุลฺลจฺจยํ อาปชฺชติ ฯ อิตเรสํ สาหตฺถิโก เอเกโก อาณตฺติกา ปญฺเจติ ตสฺมา ปาราชิกํ อาปชฺชึสุ ฯ อยเมตฺถ สงฺเขโป ฯ วิตฺถาโร ปน อทินฺนาทานปาราชิเก สํวิธาวหารวณฺณนายํ วุตฺโต ฯ ฉิทฺทํ ตสฺมึ ฆเร นตฺถีติ อยํ ปญฺหา ทุสฺสกุฏิอาทีนิ สนฺถตเปยฺยาลญฺจ สนฺธาย วุตฺตา ฯ เตลํ มธุํ ผาณิตนฺติ คาถา ลิงฺคปริวตฺตํ สนฺธาย วุตฺตา ฯ นิสฺสคฺคิเยนาติ คาถา ปริณามนํ สนฺธาย วุตฺตา ฯ โย หิ สงฺฆสฺส ปริณตลาภโต เอกํ จีวรํ อตฺตโน เอกํ อญฺญสฺสาติ เทฺว จีวรานิ เอกํ มยฺหํ เอกํ ตสฺส เทหีติ เอกปฺปโยเคน ปริณาเมติ ฯ โส นิสฺสคฺคิยปาจิตฺติยญฺเจว สุทฺธิกปาจิตฺติยญฺจ เอกโต อาปชฺชติ ฯ กมฺมญฺจ ตํ กุปฺเปยฺย วคฺคปจฺจยาติ อยํ ปญฺหา ทฺวาทสโยชนปฺปมาเณสุ พาราณสีอาทีสุ นคเรสุ คามสีมํ สนฺธาย วุตฺตา ฯ ปทวีติหารมตฺเตนาติ คาถา สญฺจริตฺตํ สนฺธาย วุตฺตา ฯ อตฺโถปิ จสฺสา สญฺจริตฺตวณฺณนายเมว วุตฺโต ฯ สพฺพานิ ตานิ นิสฺสคฺคิยานีติ อยํ ปญฺหา อญฺญาติกาย ภิกฺขุนิยา โธวาปนํ สนฺธาย วุตฺตา ฯ สเจปิ หิ ติณฺณํ จีวรานํ กากโอหนํ วา กทฺทมมกฺขิตํ วา กณฺณํ คเหตฺวา ภิกฺขุนี อุทเกน โธวติ ภิกฺขุสฺส กายคตาเนว นิสฺสคฺคิยานิ โหนฺติ ฯ สรณคมนมฺปิ น จ ตสฺส อตฺถีติ สรณคมนอุปสมฺปทาปิ นตฺถิ ฯ อยํ ปญฺหา มหาปชาปติยา อุปสมฺปทํ สนฺธาย วุตฺตา ฯ หเนยฺย อนริยํ มนฺโทติ ตํปิ อิตฺถึ วา ปุริสํ วา อนริยํ หเนยฺย ฯ อยํ ปญฺหา ลิงฺคปริวตฺตเนน อิตฺถีภูตํ ปิตรํ ปุริสภูตํ จ มาตรํ สนฺธาย วุตฺตา ฯ