๑. ฉันทสูตร ที่ ๑

Yaṃ bhikkhave aniccaṃ tatra vo chando pahātabbo . Kiñca bhikkhave aniccaṃ . cakkhuṃ bhikkhave aniccaṃ tatra vo chando pahātabbo .pe. jivhā aniccā tatra vo chando pahātabbo .pe. mano anicco tatra vo chando pahātabbo . yaṃ bhikkhave aniccaṃ tatra vo chando pahātabboti. {257.1} Yaṃ bhikkhave aniccaṃ tatra vo rāgo pahātabbo . Kiñca bhikkhave aniccaṃ . cakkhuṃ bhikkhave aniccaṃ tatra vo rāgo pahātabbo .pe. jivhā aniccā tatra vo rāgo pahātabbo .pe. mano anicco tatra vo rāgo pahātabbo . yaṃ bhikkhave aniccaṃ tatra vo rāgo pahātabboti. {257.2} Yaṃ bhikkhave aniccaṃ tatra vo chandarāgo pahātabbo. Kiñca bhikkhave aniccaṃ . cakkhuṃ bhikkhave aniccaṃ tatra vo chandarāgo pahātabbo .pe. jivhā aniccā tatra vo chandarāgo pahātabbo .pe. mano anicco tatra vo chandarāgo pahātabbo . yaṃ bhikkhave aniccaṃ tatra vo chandarāgo pahātabboti.