๓. อาเวณิกสูตร
เล่มที่ ๑๘ · ข้อ ๔๖๒ · บรรทัด ๖๓๑๘
คัดจากพระไตรปิฎกบาลีอักษรโรมัน ฉบับสยามรัฐ ตัวบทจาก 84000.org
บาลีอักษรโรมัน ฉบับสยามรัฐ
Pañcimāni bhikkhave mātugāmassa āveṇikāni dukkhāni yāni mātugāmo paccanubhoti aññatreva purisehi . katamāni pañca . idha bhikkhave mātugāmo daharo samāno patikulaṃ gacchati ñātakehi vinā hoti . idaṃ bhikkhave mātugāmassa paṭhamaṃ āveṇikaṃ dukkhaṃ yaṃ mātugāmo paccanubhoti aññatreva purisehi.
Puna caparaṃ bhikkhave mātugāmo utunī hoti. Idaṃ bhikkhave mātugāmassa dutiyaṃ āveṇikaṃ dukkhaṃ yaṃ mātugāmo paccanubhoti aññatreva purisehi.
Puna caparaṃ bhikkhave mātugāmo gabbhinī hoti. Idaṃ bhikkhave mātugāmassa tatiyaṃ āveṇikaṃ dukkhaṃ yaṃ mātugāmo paccanubhoti aññatreva purisehi.
Puna caparaṃ bhikkhave mātugāmo vijāyati . idaṃ bhikkhave mātugāmassa catutthaṃ āveṇikaṃ dukkhaṃ yaṃ mātugāmo paccanubhoti aññatreva purisehi.
Puna caparaṃ bhikkhave mātugāmo purisassa pāricariyaṃ upeti. Idaṃ kho bhikkhave mātugāmassa pañcamaṃ āveṇikaṃ dukkhaṃ yaṃ mātugāmo paccanubhoti aññatreva purisehi . imāni kho bhikkhave pañca mātugāmassa āveṇikāni dukkhāni yāni mātugāmo paccanubhoti aññatreva purisehīti. Tatiyaṃ.
ที่มา: พระไตรปิฎกบาลีอักษรโรมัน ฉบับสยามรัฐ เล่มที่ ๑๘ ข้อ ๔๖๒ จาก 84000.org
รายงานข้อผิดพลาด