สาริปุตตสูตร ที่ ๒

Atha kho āyasmā sārīputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinnaṃ kho āyasmantaṃ sārīputtaṃ bhagavā etadavoca sotāpattiyaṅgaṃ sotāpattiyaṅganti hidaṃ sārīputta vuccati katamaṃ nu kho sārīputta sotāpattiyaṅganti.

Sappurisasaṃsevo hi bhante sotāpattiyaṅgaṃ saddhammassavanaṃ sotāpattiyaṅgaṃ yonisomanasikāro sotāpattiyaṅgaṃ dhammānudhammapaṭipatti sotāpattiyaṅganti.

Sādhu sādhu sārīputta sappurisasaṃsevo hi sārīputta sotāpattiyaṅgaṃ saddhammassavanaṃ sotāpattiyaṅgaṃ yonisomanasikāro sotāpattiyaṅgaṃ dhammānudhammapaṭipatti sotāpattiyaṅgaṃ.

Soto sototi 1- hidaṃ sārīputta vuccati katamo nu kho sārīputta sototi . ayameva hi bhante ariyo aṭṭhaṅgiko maggo soto . seyyathīdaṃ . sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhīti. @Footnote: 1 Yu. ... sototiha sārīputta.

Sādhu sādhu sārīputta ayameva hi sārīputta ariyo aṭṭhaṅgiko maggo soto . seyyathīdaṃ . sammādiṭṭhi .pe. Sammāsamādhi.

Sotāpanno sotāpannoti hidaṃ sārīputta vuccati katamo nu kho sārīputta sotāpannoti . yo hi bhante iminā ariyena aṭṭhaṅgikena maggena samannāgato ayaṃ vuccati sotāpanno svāyaṃ āyasmā evaṃnāmo evaṃgottoti.

Sādhu sādhu sārīputta [1]- iminā ariyena aṭṭhaṅgikena maggena samannāgato ayaṃ vuccati sotāpanno svāyaṃ āyasmā evaṃnāmo evaṃgottoti.