วัชชีสูตร ที่ ๑

Ekaṃ samayaṃ bhagavā vajjīsu viharati koṭigāme . Tatra kho bhagavā bhikkhū āmantesi catunnaṃ bhikkhave ariyasaccānaṃ ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca . katamesaṃ catunnaṃ . dukkhassa bhikkhave ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca dukkhasamudayassa ariyasaccassa .pe. Dukkhanirodhassa ariyasaccassa . dukkhanirodhagāminīpaṭipadāya ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca . tayidaṃ bhikkhave dukkhaṃ ariyasaccaṃ anubuddhaṃ paṭividdhaṃ dukkhasamudayo ariyasaccaṃ anubuddhaṃ paṭividdhaṃ dukkhanirodho ariyasaccaṃ anubuddhaṃ paṭividdhaṃ dukkhanirodhagāminīpaṭipadā ariyasaccaṃ anubuddhaṃ paṭividdhaṃ . ucchinnā bhavataṇhā khīṇā bhavanetti natthidāni punabbhavoti . idamavoca bhagavā idaṃ vatvāna sugato athāparaṃ etadavoca satthā

Catunnaṃ ariyasaccānaṃ yathābhūtamadassanā saṃsaritaṃ dīghamaddhānaṃ tāsu tāsveva jātisu. Yāni etāni diṭṭhāni bhavanetti samūhatā ucchinnaṃ mūlaṃ dukkhassa natthidāni punabbhavoti.