๘. อัมพวิมาน

|46.553| 8 Dibbante ambavanaṃ rammaṃ pāsādettha mahallako nānāturiyasaṅghuṭṭho accharāgaṇaghosito |46.554| padīpo cettha jalati niccaṃ sovaṇṇayo mahā dussaphalehi rukkhehi samantā parivārito kena te ambavanaṃ rammaṃ pāsādettha mahallako |46.555| kena tetādiso vaṇṇo ... Pe ... Vaṇṇo ca te sabbadisā pabhāsatīti. |46.556| Sā devatā attamanā moggallānena pucchitā ... Pe ... yassa kammassidaṃ phalaṃ |46.557| ahaṃ manussesu manussabhūtā purimāya jātiyā manussaloke vihāraṃ saṅghassa kāresiṃ ambehi parivāritaṃ |46.558| pariyosite vihāre kārente niṭṭhite mahe ambehacchādayitvāna katvā dussamaye phale |46.559| padīpaṃ tattha jāletvā bhojayitvā gaṇuttamaṃ niyyādesiṃ taṃ saṅghassa pasannā sakehi pāṇihi |46.560| tena me ambavanaṃ rammaṃ pāsādettha mahallako nānāturiyasaṅghuṭṭho accharāgaṇaghosito |46.561| padīpo cettha jalati niccaṃ sovaṇṇayo mahā dussaphalehi rukkhehi samantā parivārito |46.562| tena metādiso vaṇṇo ... Pe ... Vaṇṇo ca me sabbadisā pabhāsatīti. Ambavimānaṃ aṭṭhamaṃ.