๑๔. อโยฆรชาดก

ยเมกรตฺตึ ปฐมํ คพฺเภ วสติ มาณโว อพฺภุฏฺฐิโตว โส ยาติ ส คจฺฉํ น นิวตฺตติ ฯ

น ยุชฺฌมานา น พเลน วสฺสิตา นรา น ชีรนฺติ น จาปิ มิยฺยเร สพฺพญฺหิ ๑ ตํ ชาติชรายุปทฺทุตํ ตมฺเม มตี โหติ จรามิ ธมฺมํ ฯ

จตุรงฺคินึ เสน ๒ สุภึสรูปํ ชยนฺติ รฏฺฐาธิปตี ปสยฺห น มจฺจุโน ชยิตุมุสฺสหนฺติ ตมฺเม มตี โหติ จรามิ ธมฺมํ ฯ

หตฺถีหิ อสฺเสหิ รเถหิ ปตฺติหิ ปริวาริตา มุญฺจเร เอกจฺเจยฺยา น มจฺจุโน มุญฺจิตุมุสฺสหนฺติ ตมฺเม มตี โหติ จรามิ ธมฺมํ ฯ

หตฺถีหิ อสฺเสหิ รเถหิ ปตฺติหิ สูรา ปภญฺชนฺติ ปธํสยนฺติ น มจฺจุโน ภญฺชิตุมุสฺสหนฺติ ตมฺเม มตี โหติ จรามิ ธมฺมํ ฯ

มตฺตา คชา ภินฺนคฬา ปภินฺนา #๑ ม. สพฺพํ หิทํ ฯ ๒ ม. เสนํ ฯ นครานิ มทฺทนฺติ ชนํ หนนฺติ น มจฺจุโน มทฺทิตุมุสฺสหนฺติ ตมฺเม มตี โหติ จรามิ ธมฺมํ ฯ

อิสฺสาสิโน กตหตฺถาปิ วีรา ๑ ทูเรปาตี อกฺขณเวธิโนปิ น มจฺจุโน วิชฺฌิตุมุสฺสหนฺติ ตมฺเม มตี โหติ จรามิ ธมฺมํ ฯ

สรานิ ขียนฺติ สเสลกานนา สพฺพํปิ ตํ ๒ ขียติ ทีฆมนฺตรํ สพฺพํ หิ ตํ ๓ ภญฺชเร กาลปริยายํ ตมฺเม มตี โหติ จรามิ ธมฺมํ ฯ

สพฺเพสเมวํ หิ นรีนรานํ ๔ จลาจลํ ปาณภุโนธ ชีวิตํ ปโฏว ธุตฺตสฺส ทุโมว กูลโช ตมฺเม มตี โหติ จรามิ ธมฺมํ ฯ

ทุมปฺผลาเนว ปตนฺติ มาณวา ทหรา จ วุฑฺฒา จ สรีรเภทา นาริโย นรา มชฺฌิมโปริสา จ ตมฺเม มตี โหติ จรามิ ธมฺมํ ฯ

นายํ วโย ตารกราชสนฺนิโภ #๑ สี. ยุ. ธีรา ฯ ๒-๓ ม. สพฺพํ หิทํ ฯ ๔ ม. นรานนารินํ ฯ ยุ. นรานรีนํ ฯ ยทพฺภตีตํ คตเมวทานิ ตํ ชิณฺณสฺส หี นตฺถิ รตี กุโต สุขํ ตมฺเม มตี โหติ จรามิ ธมฺมํ ฯ

ยกฺขา ปิสาจา อถวาปิ เปตา กุปฺปิตา ๑ เต อสฺสสนฺติ มนุสฺเส น มจฺจุโน อสฺสสิตุมุสฺสหนฺติ ตมฺเม มตี โหติ จรามิ ธมฺมํ ฯ

ยกฺเข ปิสาเจ อถวาปิ เปเต กุปฺปิเตปิ เต นิชฺฌปนํ กโรนฺติ น มจฺจุโน นิชฺฌปนมุสฺสหนฺติ ๒ ตมฺเม มตี โหติ จรามิ ธมฺมํ ฯ

อปราธเก ทูสเก เหฐเก จ ราชาโน ทณฺเฑนฺติ วิทิตฺวาน โทสํ น มจฺจุโน ทณฺฑยิตุมุสฺสหนฺติ ๓ ตมฺเม มตี โหติ จรามิ ธมฺมํ ฯ

อปราธกา ทูสกา เหฐกา จ ลภนฺติ เต ราชาโน นิชฺฌเปตุํ น มจฺจุโน นิชฺฌปนํ กโรนฺติ ตมฺเม มตี โหติ จรามิ ธมฺมํ ฯ

น ขตฺติโยปิ น จ พฺราหฺมโณปิ #๑ ม. กุปิตา เต ฯ สี. ยุ. กุปิตาปิ เต ฯ ๒ ม. นิชฺฌปนํ กโรนฺติ ฯ #๓ ม. ฑณฺฑยิตุสฺสหนฺติ ฯ น อฑฺฒกา พลวา เตชวาปิ น มจฺจุราชสฺส อเปกฺขมตฺถิ ตมฺเม มตี โหติ จรามิ ธมฺมํ ฯ

สีหา จ พฺยคฺฆา จ อโถปิ ทีปิโย ปสยฺห ขาทนฺติ วิผนฺทมานํ น มจฺจุโน ขาทิตุมุสฺสหนฺติ ตมฺเม มตี โหติ จรามิ ธมฺมํ ฯ

มายาการา รงฺคมชฺเฌ กโรนฺตา โมเหนฺติ จกฺขูนิ ชนสฺส ตาวเท น มจฺจุโน โมหยิตุมุสฺสหนฺติ ตมฺเม มตี โหติ จรามิ ธมฺมํ ฯ

อาสีวิสา กุปฺปิตา อุคฺคเตชา ฑํสนฺติ มาเรนฺติปิ เต มนุสฺเส น มจฺจุโน ฑํสิตุมุสฺสหนฺติ ตมฺเม มตี โหติ จรามิ ธมฺมํ ฯ

อาสีวิสา กุปฺปิตา ยํ ฑํสนฺติ ติกิจฺฉกา เตส วิสํ หนนฺติ น มจฺจุโน ทฏฺฐวิสํ หนนฺติ ตมฺเม มตี โหติ จรามิ ธมฺมํ ฯ

ธมฺมนฺตรี เวตฺตรุโณ ๑ จ โภโช #๑ ม. เวตฺตรณี ฯ สี. ยุ. เวตรณี ฯ วิสานิ หนฺตฺวาน ภุชงฺคมานํ สุยฺยนฺติ เต กาลกตา ตเถว ตมฺเม มตี โหติ จรามิ ธมฺมํ ฯ

วิชฺชาธรา โฆรมธียมานา อทสฺสนํ โอสเธภิ วชนฺติ น มจฺจุราชสฺส วชนฺติ อทสฺสนํ ตมฺเม มตี โหติ จรามิ ธมฺมํ ฯ

ธมฺโม หเว รกฺขติ ธมฺมจารึ ธมฺโม สุจิณฺโณ สุขมาวหาติ เอสานิสํโส ธมฺเม สุจิณฺเณ น ทุคฺคตึ คจฺฉติ ธมฺมจารี ฯ

นหิ ธมฺโม อธมฺโม จ อุโภ สมวิปากิโน อธมฺโม นิรยํ เนติ ธมฺโม ปาเปติ สุคฺคตินฺติ ฯ อโยฆรชาตกํ จุทฺทสมํ ฯ ตสฺสุทฺทานํ มาตงฺค สมฺภูต สีวิ สิริมนฺโต โรหน หํส สตฺติคุมฺโพ ภลฺลาติย โสมนสฺส จมฺเปยฺย พฺรหฺม ปญฺจ- ปณฺฑิต จิรสฺสํวต อโยฆราติ ฯ วีสตินิปาตํ นิฏฺฐิตํ ฯ ตึสตินิปาตชาตกํ