สิกขาบทที่ ๑๓ เรื่องภิกษุณีรูปหนึ่ง

Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññatarā bhikkhunī asaṅkacchikā gāmaṃ piṇḍāya pāvisi . tassā rathiyāya vātamaṇḍalikā saṅghāṭiyo ukkhipiṃsu . manussā ukkuṭṭhiṃ akaṃsu sundaro ayyāya thanudaroti 1- . sā bhikkhunī manussehi upphaṇḍiyamānā maṅku ahosi. {480.1} Athakho sā bhikkhunī upassayaṃ gantvā bhikkhunīnaṃ etamatthaṃ ārocesi . yā tā bhikkhuniyo appicchā .pe. tā ujjhāyanti khayanti vipācenti kathaṃ hi nāma bhikkhunī asaṅkacchikā gāmaṃ pavisissatīti .pe. saccaṃ kira bhikkhave bhikkhunī asaṅkacchikā gāmaṃ pavisatīti 2- . Saccaṃ bhagavāti. {480.2} Vigarahi buddho bhagavā kathaṃ hi nāma bhikkhave bhikkhunī asaṅkacchikā gāmaṃ pavisissati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {480.3} yā pana bhikkhunī asaṅkacchikā gāmaṃ paviseyya pācittiyanti.

Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . asaṅkacchikāti vinā saṅkacchikaṃ. @Footnote: 1 Yu. sundarā ayyāya tanutaroti. Ma. sundarā ayyāya thanutaroti. 2 Ma. Yu. @pāvisīti. Saṅkacchikaṃ nāma adhakkhakaṃ ubbhanābhi tassa paṭicchādanatthāya . Gāmaṃ paviseyyāti parikkhittassa gāmassa parikkhepaṃ atikkamantiyā 1- āpatti pācittiyassa . aparikkhittassa gāmassa upacāraṃ okkamantiyā āpatti pācittiyassa.

Anāpatti acchinnacīvarikāya naṭṭhacīvarikāya gilānāya asatiyā ajānantiyā [2]- ummattikāya ādikammikāyāti.