๑. โถมกเถราปทาน (๒๕๑)

|๒๕๓.๑| เทวโลเก ฐิโต สนฺโต วิปสฺสิสฺส มเหสิโน ธมฺมํ สุตฺวาน มุทิโต อิมํ วาจํ อภาสหํ ฯ |๒๕๓.๒| นโม เต ปุริสาชญฺญ นโม เต ปุริสุตฺตม พหุชฺชนํ ตารยสิ เทเสนฺโต อมตํ ปทํ ฯ |๒๕๓.๓| เอกนวุเต อิโต กปฺเป ยํ วาจํ อภณึ ตทา ทุคฺคตึ นาภิชานามิ โถมนาย อิทํ ผลํ ฯ |๒๕๓.๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โถมโก เถโร อิมา คาถาโย อภาสิตฺถาติ ฯ โถมกตฺเถรสฺส อปทานํ สมตฺตํ ฯ