๖. วัลลิผลทายกเถราปทาน (๓๘๖)

|๓๘๘.๓๑| สพฺเพ ชนา สมาคมฺม อาคมึสุ วนํ ตทา ผลมเนฺวสมานา เต อลภึสุ ผลํ ตทา ฯ |๓๘๘.๓๒| ตตฺถทฺทสาสึ สมฺพุทฺธํ สยมฺภุํ อปราชิตํ ปสนฺนจิตฺโต สุมโน วลฺลิผลมทาสหํ ฯ |๓๘๘.๓๓| เอกตฺตึเส อิโต กปฺเป ยํ ผลํ อททึ ตทา ทุคฺคตึ นาภิชานามิ ผลทานสฺสิทํ ผลํ ฯ |๓๘๘.๓๔| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๘๘.๓๕| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๘๘.๓๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา วลฺลิผลทายโก เถโร อิมา คาถาโย อภาสิตฺถาติ ฯ วลฺลิผลทายกตฺเถรสฺส อปทานํ สมตฺตํ ฯ