๔. สันนิฏฐาปกเถราปทาน (๔๔)

|46.70| Aññe kuṭikaṃ katvā vasāmi pabbatantare lābhālābhena santuṭṭho yasena ayasena ca. |46.71| Padumuttaro lokavidū āhutīnaṃ paṭiggaho bhikkhusatasahassehi 1- āgañchi mama santike. |46.72| Upāgataṃ mahānāgaṃ 2- jalajuttamanāmakaṃ tiṇasantharaṃ paññāpetvā adāsiṃ satthuno ahaṃ. |46.73| Pasannacitto sumano āmaṇḍaṃ pāniyañcahaṃ adāsiṃ ujubhūtassa vippasannena cetasā. |46.74| Kappe ito satasahasse yaṃ dānamadadiṃ tadā duggatiṃ nābhijānāmi āmaṇḍassa idaṃ phalaṃ. |46.75| Ekatāḷīsakappamhi eko āsi arindamo sattaratanasampanno cakkavatti mahabbalo. |46.76| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā sanniṭṭhāpako thero imā gāthāyo abhāsitthāti. Sanniṭṭhāpakattherassa apadānaṃ samattaṃ. @Footnote: 1 Ma. Yu. vīsasatasahassehi. 2 Yu. mahāvīraṃ.