๖. สปริวาราสนเถราปทาน (๕๖)

|58.43| Padumuttarabuddhassa piṇḍapātaṃ adāsahaṃ gantvā kiliṭṭhakaṭṭhānaṃ 1- mallikāhi parikkhitaṃ. |58.44| Tamhāsanamhi āsīno buddho lokagganāyako akittayi piṇḍapātaṃ ujubhūto samāhito. |58.45| Yathāpi bhaddake khette bījaṃ appampi ropitaṃ sammā dhāraṃ pavecchanto phalaṃ toseti kassakaṃ. |58.46| Tathevāyaṃ piṇḍapāto sukhette ropito tayā bhave nibbattamānamhi phalante 2- tosayissati. |58.47| Idaṃ vatvāna sambuddho jalajuttamanāmako piṇḍapātaṃ gahetvāna pakkāmi uttarāmukho. |58.48| Saṃvuto pāṭimokkhasmiṃ indriyesu ca pañcasu pavivekamanuyutto viharāmi anāsavo. @Footnote: 1 Yu. gantvā taṃ bhojanaṭṭhānaṃ. 2 Yu. phalato. |58.49| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā saparivārāsano thero imā gāthāyo abhāsitthāti. Saparivārāsanattherassa apadānaṃ samattaṃ.