๑. สีลวนาคจริยา

|11.1| Yadā ahosiṃ pavane kuñjaro mātuposako na tadā atthi mahiyā guṇena mama sādiso. |11.2| Pavane disvā vanacaro rañño maṃ paṭivedayi tavānucchavo mahārāja gajo asati 1- kānane. |11.3| Na tassa parikkhāyattho napi āḷhakakāsuyā 2- samāgahite soṇḍāya sayameva idhehiti. |11.4| Tassa taṃ vacanaṃ sutvā rājāpi tuṭṭhamānaso pesesi hatthidamakaṃ chekācariyaṃ susikkhitaṃ. |11.5| Gantvā so hatthidamako addasa padumassare bhisamūḷālaṃ 3- uddharantaṃ yāpanatthāya mātuyā. |11.6| Viññāya me sīlaguṇaṃ lakkhaṇaṃ upadhārayi ehi puttāti vatvāna soṇḍāya mama aggahi. |11.7| Yaṃ me tadā pākatikaṃ sarīrānugataṃ balaṃ ajja nāgasahassānaṃ balena samasādisaṃ. |11.8| Yadihantesaṃ pakuppeyyaṃ upetaṃ 4- gahaṇāya maṃ paṭibalo bhave tesaṃ yāva rajjampi mānusaṃ. @Footnote: 1 Ma. Yu. vasati. 2 Ma. Yu. āḷaka.... 3 Yu. bhisamūlaṃ. 4 Ma. upetānaṃ. |11.9| Apicāhaṃ sīlarakkhāya sīlapāramipūriyā na karomi citte aññathattaṃ pakkhipantaṃ mamāḷhake 1- . |11.10| Yadi te maṃ tattha koṭeyyuṃ pharasūhi tomarehi ca neva tesaṃ pakuppeyyaṃ sīlakhaṇḍabhayā mamāti. Sīlavanāgacariyaṃ 2- paṭhamaṃ.