๙. วัฏฏกโปตกจริยา

|29.72| Punāparaṃ yadā homi magadhe vaṭṭapotako ajātapakkho taruṇo maṃsapesi kulāvake. |29.73| Mukhatuṇḍakena āharitvā mātā posayatī mamaṃ tassā phassena jīvāmi natthi me kāyikaṃ balaṃ. |29.74| Saṃvacchare gimhasamaye davadāho padippati upagacchati amhākaṃ pāvako kaṇhavattani. |29.75| Dhamadhamaṃ 1- iti evaṃ saddāyanto mahā sikhī anupubbena jhāpento aggi mamamupāgami. |29.76| Aggivegabhayā bhītā tasitā mātā pitā mama kulāvake maṃ chaḍḍetvā attānaṃ parimocayuṃ. |29.77| Pāde pakkhe pajahāmi natthi me kāyikaṃ balaṃ sohaṃ agatiko tattha evaṃ cintesahaṃ tadā. |29.78| Yesāhaṃ upadhāveyyaṃ bhīto tasitavedhito te maṃ ohāya pakkantā kathaṃ me ajja kātave. |29.79| Atthi loke sīlaguṇo saccaṃ soceyyanuddayā tena saccena kāhāmi saccakiriyamuttamaṃ 2- . |29.80| Āvajjitvā dhammabalaṃ saritvā pubbake jine saccabalamavassāya saccakiriyamakāsahaṃ. @Footnote: 1 Ma. dhamadhamā. Yu. dhūmadhūmañjanītvevaṃ. 2 saccakiriyamanuttaraṃ itipi pāṭho. |29.81| Santi pakkhā apatanā santi pādā avañcanā mātā pitā ca nikkhantā jātaveda paṭikkama. |29.82| Saha sacce kate mayhaṃ mahāpajjalito sikhī vajjesi soḷasa karīsāni udakaṃ patvā yathā sikhī saccena me samo natthi esā me saccapāramīti. Vaṭṭakapotakacariyaṃ navamaṃ.