๑. ปังสุกุลสัญญกเถราปทาน

|71.1| Tisso nāmāsi bhagavā sayambhū lokanāyako 1- paṃsukūlaṃ ṭhapetvāna vihāraṃ pāvisī jino. |71.2| Sajjitaṃ 2- dhanumādāya pakkhittasalilaṃ 3- ahaṃ maṇḍalaggaṃ gahetvāna kānanaṃ pāvisiṃ ahaṃ. |71.3| Tatthaddasaṃ paṃsukūlaṃ dumagge laggitaṃ tadā cāpaṃ tattheva nikkhippa sīse katvāna añjaliṃ. |71.4| Pasannacitto sumano vipulāya ca pītiyā buddhaseṭṭhaṃ saritvāna paṃsukūlaṃ avandahaṃ. |71.5| Dvenavute ito kappe yaṃ paṃsukūlamavandahaṃ duggatiṃ nābhijānāmi vandanāya idaṃ phalaṃ. |71.6| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. @Footnote: 1 Ma. Yu. aggapuggalo. 2 Ma. vinataṃ. Yu. tiyantaṃ. 3 Ma. bhakkhatthāya cariṃ @ahaṃ. Yu. akkhitto yamariṃ ahaṃ. |71.7| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |71.8| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā paṃsukūlasaññako thero imā gāthāyo abhāsitthāti. Paṃsukūlasaññakattherassa apadānaṃ samattaṃ.