กรรมกถา

Sabbe kammā niyatāti. Āmantā. Micchattaniyatāti. Āmantā . micchattaniyatāti . na hevaṃ vattabbe .pe. Sammattaniyatāti . na hevaṃ vattabbe .pe. natthi aniyato rāsīti. Na hevaṃ vattabbe .pe. nanu atthi aniyato rāsīti . āmantā. Hañci atthi aniyato rāsi no vata re vattabbe sabbe kammā niyatāti.

Sabbe kammā niyatāti . āmantā. Nanu tayo rāsī vuttā bhagavatā micchattaniyato rāsi sammattaniyato rāsi aniyato rāsīti . āmantā . hañci tayo rāsī vuttā bhagavatā micchattaniyato rāsi sammattaniyato rāsi aniyato rāsi no vata re vattabbe sabbe kammā niyatāti.

Diṭṭhadhammavedaniyaṃ kammaṃ diṭṭhadhammavedaniyaṭṭhena niyatanti . āmantā . micchattaniyatanti . na hevaṃ vattabbe .pe. Sammattaniyatanti . na hevaṃ vattabbe .pe. upapajjavedaniyaṃ kammaṃ .pe. aparāpariyavedaniyaṃ kammaṃ aparāpariyavedaniyaṭṭhena niyatanti . Āmantā . micchattaniyatanti . Na hevaṃ vattabbe .pe. Sammattaniyatanti. Na hevaṃ vattabbe .pe.

Na vattabbaṃ diṭṭhadhammavedaniyaṃ kammaṃ diṭṭhadhammavedaniyaṭṭhena niyataṃ upapajjavedaniyaṃ kammaṃ .pe. aparāpariyavedaniyaṃ kammaṃ aparāpariyavedaniyaṭṭhena niyatanti . āmantā . diṭṭhadhammavedaniyaṃ kammaṃ upapajjavedaniyaṃ hoti aparāpariyavedaniyaṃ hoti .pe. Upapajjavedaniyaṃ kammaṃ diṭṭhadhammavedaniyaṃ hoti aparāpariyavedaniyaṃ hoti .pe. Aparāpariyavedaniyaṃ kammaṃ diṭṭhadhammavedaniyaṃ hoti upapajjavedaniyaṃ hotīti . na hevaṃ vattabbe .pe. tena hi diṭṭhadhammavedaniyaṃ kammaṃ diṭṭhadhammavedaniyaṭṭhena niyataṃ upapajjavedaniyaṃ kammaṃ .pe. Aparāpariyavedaniyaṃ kammaṃ aparāpariyavedaniyaṭṭhena niyatanti. Kammakathā. Ekavīsatimo vaggo. Tassa uddānaṃ sāsanaṃ navaṃ kataṃ atthi koci tathāgatassa sāsanaṃ navaṃ karoti labbhā tathāgatassa sāsanaṃ puna navaṃ kātuṃ puthujjano tedhātukehi dhammehi avivitto atthi kiñci saññojanaṃ appahāya arahattappatti atthi adhippāyaiddhi buddhānaṃ vā sāvakānaṃ vā atthi buddhānaṃ buddhehi hīnātirekatā sabbā disā buddhā tiṭṭhanti sabbe dhammā niyatā sabbe kammā niyatāti. ---------