อนาสวกถา

Arahato sabbe dhammā anāsavāti . āmantā . Maggo phalaṃ nibbānaṃ sotāpattimaggo sotāpattiphalaṃ sakadāgāmimaggo sakadāgāmiphalaṃ anāgāmimaggo anāgāmiphalaṃ arahattamaggo arahattaphalaṃ satipaṭṭhānaṃ sammappadhānaṃ iddhipādo indriyaṃ balaṃ bojjhaṅgoti . Na hevaṃ vattabbe .pe.

Arahato sabbe dhammā anāsavāti . āmantā . Arahato cakkhuṃ anāsavanti . na hevaṃ vattabbe .pe. arahato cakkhuṃ anāsavanti . āmantā . maggo phalaṃ nibbānaṃ sotāpattimaggo sotāpattiphalaṃ .pe. bojjhaṅgoti . na hevaṃ vattabbe .pe. Arahato sotaṃ .pe. arahato ghānaṃ .pe. arahato jivhā .pe. Arahato kāyo anāsavoti. Na hevaṃ vattabbe .pe.

Arahato kāyo anāsavoti . āmantā . maggo phalaṃ nibbānaṃ sotāpattimaggo sotāpattiphalaṃ .pe. bojjhaṅgoti . Na hevaṃ vattabbe .pe.

Arahato kāyo anāsavoti . āmantā . arahato kāyo paggahaniggahūpago chedanabhedanūpago kākehi gijjhehi kulalehi sādhāraṇoti . āmantā . anāsavo dhammo paggahaniggahūpago chedanabhedanūpago kākehi gijjhehi kulalehi sādhāraṇoti . na hevaṃ Vattabbe .pe.

Arahato kāye visaṃ kāmeyya satthaṃ kameyya aggiṃ kameyyāti . āmantā . anāsave dhamme visaṃ kameyya satthaṃ kameyya aggiṃ kameyyāti. Na hevaṃ vattabbe .pe.

Labbhā arahato kāyo addubandhanena bandhituṃ rajjubandhanena bandhituṃ saṅkhalikabandhanena bandhituṃ gāmabandhanena bandhituṃ nigamabandhanena bandhituṃ nagarabandhanena bandhituṃ janapadabandhanena bandhituṃ kaṇṭhapañcamehi bandhanehi bandhitunti . āmantā . Labbhā anāsavo dhammo addubandhanena bandhituṃ rajjubandhanena bandhituṃ saṅkhalikabandhanena bandhituṃ gāmabandhanena nigamabandhanena nagarabandhanena janapadabandhanena kaṇṭhapañcamehi bandhanehi bandhitunti . na hevaṃ vattabbe .pe.

Yadi arahā puthujjanassa cīvaraṃ deti anāsavaṃ hutvā sāsavaṃ hotīti . na hevaṃ vattabbe .pe. anāsavaṃ hutvā sāsavaṃ hotīti . āmantā . taññeva anāsavaṃ taṃ sāsavanti . na hevaṃ vattabbe .pe. taññeva anāsavaṃ taṃ sāsavanti . āmantā . Maggo anāsavo hutvā sāsavo hotīti . na hevaṃ vattabbe .pe. phalaṃ satipaṭṭhānaṃ sammappadhānaṃ iddhipādo indriyaṃ balaṃ bojjhaṅgo anāsavo hutvā sāsavo hotīti. Na hevaṃ vattabbe .pe.

Yadi arahā puthujjanassa piṇḍapātaṃ deti senāsanaṃ Deti gilānapaccayabhesajjaparikkhāraṃ deti anāsavo hutvā sāsavo hotīti . na hevaṃ vattabbe .pe. anāsavo hutvā sāsavo hotīti . āmantā . taññeva anāsavaṃ taṃ sāsavanti . na hevaṃ vattabbe .pe. taññeva anāsavaṃ taṃ sāsavanti . āmantā . Maggo anāsavo hutvā sāsavo hotīti . na hevaṃ vattabbe .pe. phalaṃ satipaṭṭhānaṃ sammappadhānaṃ iddhipādo indriyaṃ balaṃ bojjhaṅgo anāsavo hutvā sāsavo hotīti. Na hevaṃ vattabbe .pe.

Yadi puthujjano arahato cīvaraṃ deti sāsavaṃ hutvā anāsavaṃ hotīti. Na hevaṃ vattabbe .pe.

Sāsavaṃ hutvā anāsavaṃ hotīti . āmantā . Taññeva sāsavaṃ taṃ anāsavanti . na hevaṃ vattabbe .pe. taññeva sāsavaṃ taṃ anāsavanti . āmantā . rāgo sāsavo hutvā anāsavo hotīti . na hevaṃ vattabbe .pe. doso moho .pe. Anottappaṃ sāsavaṃ hutvā anāsavaṃ hotīti. Na hevaṃ vattabbe .pe.

Yadi puthujjano arahato piṇḍapātaṃ deti senāsanaṃ deti gilānapaccayabhesajjaparikkhāraṃ deti sāsavo hutvā anāsavo hotīti. Na hevaṃ vattabbe .pe.

Sāsavo hutvā anāsavo hotīti . Āmantā. Taññeva sāsavaṃ taṃ anāsavanti . na hevaṃ vattabbe .pe. taññeva sāsavaṃ taṃ anāsavanti . āmantā . rāgo sāsavo hutvā anāsavo Hotīti . na hevaṃ vattabbe .pe. doso .pe. moho .pe. Anottappaṃ sāsavaṃ hutvā anāsavaṃ hotīti. Na hevaṃ vattabbe .pe.

Na vattabbaṃ arahato sabbe dhammā anāsavāti . Āmantā . nanu arahā anāsavoti . āmantā . hañci arahā anāsavo tena vata re vattabbe arahato sabbe dhammā anāsavāti. Anāsavakathā. ----------