กายกัมมสนิทัสสนันติกถา

Kāyakammaṃ sanidassananti . āmantā . rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti . na hevaṃ vattabbe .pe. kāyakammaṃ sanidassananti . āmantā . cakkhuñca paṭicca kāyakammañca uppajjati cakkhuviññāṇanti . na hevaṃ vattabbe .pe. cakkhuñca paṭicca kāyakammañca uppajjati cakkhuviññāṇanti . Āmantā . cakkhuñca paṭicca kāyakammañca uppajjati cakkhuviññāṇanti attheva suttantoti . natthi . cakkhuñca paṭicca rūpe ca uppajjati cakkhuviññāṇanti attheva suttantoti . Āmantā . hañci cakkhuñca paṭicca rūpe ca uppajjati cakkhu viññāṇanti attheva suttanto no vata re vattabbe cakkhuñca paṭicca kāyakammañca uppajjati cakkhuviññāṇanti.

Na vattabbaṃ kāyakammaṃ sanidassananti . āmantā . Nanu passasi abhikkamantaṃ paṭikkamantaṃ ālokentaṃ vilokentaṃ sammiñjentaṃ pasārentanti . āmantā . hañci passasi abhikkamantaṃ paṭikkamantaṃ ālokentaṃ vilokentaṃ sammiñjentaṃ pasārentaṃ tena vata re vattabbe kāyakammaṃ sanidassananti. Kāyakammaṃ sanidassanantikathā. Paṭhavīdhātu sanidassanātiādiṃ katvā kāyakammaṃ sanidassananti pariyosānakathā. Chaṭṭho vaggo. Tassa uddānaṃ niyāmo asaṅkhato paṭiccasamuppādo asaṅkhato cattāri saccāni asaṅkhatāni cattāro āruppā asaṅkhatā nirodhasamāpatti asaṅkhatā ākāso asaṅkhato ākāso sanidassano cattāro mahābhūtā pañcindriyāni tatheva kāyakammanti. ---------