เรื่องพระฉันนะ

{๓๖๕} เตน สมเยนาติ วิหารการสิกฺขาปทํ ฯ ตตฺถ โกสมฺพิยนฺติ เอวํนามเก นคเร ฯ โฆสิตาราเมติ โฆสิตสฺส อาราเม ฯ โฆสิตนามเกน กิร เสฏฺฐินา โส การิโต ตสฺมา โฆสิตาราโมติ วุจฺจติ ฯ ฉนฺนสฺสาติ โพธิสตฺตกาเล อุปฏฺฐากฉนฺนสฺส ฯ วิหารวตฺถุํ ภนฺเต ชานาหีติ วิหารสฺส ปติฏฺฐานฏฺฐานํ ภนฺเต ชานาหิ ฯ เอตฺถ จ วิหาโรติ น สกลวิหาโร เอโก อาวาโส ฯ เตเนวาห อยฺยสฺส วิหารํ การาเปสฺสามีติ ฯ เจติยรุกฺขนฺติ เอตฺถ จิตีกตตฺเถน เจติยํ ฯ ปูชารหานํ เทวฏฺฐานานเมตํ อธิวจนํ ฯ เจติยนฺติ สมฺมตํ รุกฺขํ เจติยรุกฺขํ ฯ คาเมน ปูชิตํ คามสฺส วา ปูชิตนฺติ คามปูชิตํ ฯ เอส นโย เสสปเทสุ ฯ อปิเจตฺถ ชนปโทติ เอกสฺส รญฺโญ รชฺเช เอโก โกฏฺฐาโส ฯ รฏฺฐนฺติ สกลรฏฺฐํ เวทิตพฺพํ ฯ สกลรฏฺฐมฺปิ หิ กทาจิ ตสฺส รุกฺขสฺส ปูชํ กโรติ ฯ เตน วุตฺตํ รฏฺฐปูชิตนฺติ ฯ เอกินฺทฺริยนฺติ กายินฺทฺริยํ สนฺธาย วทนฺติ ฯ ชีวสญฺญิโนติ สตฺตสญฺญิโน ฯ {๓๖๖} มหลฺลกนฺติ สสฺสามิกภาเวน สํยาจิกกุฏิโต มหนฺตภาโว เอตสฺส อตฺถีติ มหลฺลโก ฯ ยสฺมา วา วตฺถุํ เทสาเปตฺวา ปมาณาติกฺกเมนาปิ กาตุํ วฏฺฏติ ตสฺมา ปมาณมหนฺตตายปิ มหลฺลโก ฯ ตํ มหลฺลกํ ฯ ยสฺมา ปนสฺส ตํ ปมาณมหตฺตํ สสฺสามิกตฺตาว ลพฺภติ ตสฺมา ตทตฺถทสฺสนตฺถํ มหลฺลโก นาม วิหาโร สสฺสามิโก วุจฺจตีติ ปทภาชนํ วุตฺตํ ฯ เสสํ สพฺพํ กุฏีการสิกฺขาปเท วุตฺตนเยเนว เวทิตพฺพํ สทฺธึ สมุฏฺฐานาทีหิ ฯ สสฺสามิกภาวมตฺตเมว หิ เอตฺถ กิริยโต สมุฏฺฐานาภาโว ปมาณนิยมาภาโว จ วิเสโส ปมาณนิยมาภาวา จ จตุกฺกปริหานีติ ฯ

วิหารการสิกฺขาปทวณฺณนา นิฏฺฐิตา ฯ