เรื่องพระฉันนะ

{365} Tena samayenāti vihārakārasikkhāpadaṃ. Tattha kosambiyanti evaṃnāmake nagare. Ghositārāmeti ghositassa ārāme. Ghositanāmakena kira seṭṭhinā so kārito tasmā ghositārāmoti vuccati. Channassāti bodhisattakāle upaṭṭhākachannassa. Vihāravatthuṃ bhante jānāhīti vihārassa patiṭṭhānaṭṭhānaṃ bhante jānāhi. Ettha ca vihāroti na sakalavihāro eko āvāso. Tenevāha ayyassa vihāraṃ kārāpessāmīti. Cetiyarukkhanti ettha citīkatatthena cetiyaṃ. Pūjārahānaṃ devaṭṭhānānametaṃ adhivacanaṃ. Cetiyanti sammataṃ rukkhaṃ cetiyarukkhaṃ. Gāmena pūjitaṃ gāmassa vā pūjitanti gāmapūjitaṃ. Esa nayo sesapadesu. Apicettha janapadoti ekassa rañño rajje eko koṭṭhāso. Raṭṭhanti sakalaraṭṭhaṃ veditabbaṃ. Sakalaraṭṭhampi hi kadāci tassa rukkhassa pūjaṃ karoti. Tena vuttaṃ raṭṭhapūjitanti. Ekindriyanti kāyindriyaṃ sandhāya vadanti. Jīvasaññinoti sattasaññino. {366} Mahallakanti sassāmikabhāvena saṃyācikakuṭito mahantabhāvo etassa atthīti mahallako. Yasmā vā vatthuṃ desāpetvā pamāṇātikkamenāpi kātuṃ vaṭṭati tasmā pamāṇamahantatāyapi mahallako. Taṃ mahallakaṃ. Yasmā panassa taṃ pamāṇamahattaṃ sassāmikattāva labbhati tasmā tadatthadassanatthaṃ mahallako nāma vihāro sassāmiko Vuccatīti padabhājanaṃ vuttaṃ. Sesaṃ sabbaṃ kuṭīkārasikkhāpade vuttanayeneva veditabbaṃ saddhiṃ samuṭṭhānādīhi. Sassāmikabhāvamattameva hi ettha kiriyato samuṭṭhānābhāvo pamāṇaniyamābhāvo ca viseso pamāṇaniyamābhāvā ca catukkaparihānīti.

Vihārakārasikkhāpadavaṇṇanā niṭṭhitā.