๙. วัชชีปุตตสูตร

๙. วชฺชีปุตฺตสุตฺตวณฺณนา

นวเม วชฺชีปุตฺตโกติ วชฺชีรฏฺเฐ ราชปุตฺโต ฉตฺตํ ปหาย ปพฺพชิโต. สพฺพรตฺติจาโรติ กตฺติกนกฺขตฺตํ โฆเสตฺวา สกลนครํ ธชปฏากาทีหิ ปฏิสณฺเฑตฺวา ปวตฺติโต สพฺพรตฺติจาโร. อิทํ หิ นกฺขตฺตํ ยาว จาตุมฺมหาราชิเกหิ เอกาพทฺธํ โหติ. ตูริยตาฬิตวาทิตนิคฺโฆสสทฺทนฺติ เภริอาทิตูริยานํ ตาฬิตานํ วีณาทีนญฺจ วาทิตานํ วีณาทีนญฺจ วาทิตานํ นิคฺโฆสสทฺทํ. อภาสีติ เวสาลิยํ กิร สตฺต ราชสหสฺสานิ สตฺตสตานิ สตฺต จ ราชาโน, ตตฺตกาว เตสํ อุปราชเสนาปติอาทโย, เตสุ อลงฺกตปฏิยตฺเตสุ นกฺขตฺตกีฬนตฺถาย วีถึ โอติณฺเณสุ สฏฺฐีหตฺเถ มหาจงฺกเม จงฺกมมาโน นภมชฺเฌ ฐิตํ จนฺทํ ทิสฺวา จงฺกมโกฏิยํ ผลกํ นิสฺสาย ฐิโต อภาสิ. อปวิทฺธํว วนสฺมึ ทารุกนฺติ วตฺถเวฐนาลงฺการวิรหิตตฺตา วเน ฉฑฺฑิตทารุกํ วิย ชาตํ. ปาปิโยติ ลามกตโร อเมฺหหิ อญฺโญ โกจิ อตฺถิ. ปิหยนฺตีติ เถโร อารญฺญิโก ปํสุกูลิโก ปิณฺฑปาติโก สปทานจาริโก อปฺปิจฺโฉ สนฺตุฏฺโฐติ พหู ตุยฺหํ ปตฺถยนฺตีติ อตฺโถ. สคฺคคามินนฺติ สคฺคํ คจฺฉนฺตานํ คตานํปิ. นวมํ.