๔. อัจจยสูตร

Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena dve bhikkhū sampayojesuṃ . tatreko bhikkhu accasarā . atha kho so bhikkhu tassa bhikkhuno santike accayaṃ accayato deseti . so bhikkhu na paṭiggaṇhāti.

Atha kho sambahulā bhikkhū yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ idha bhante dve bhikkhū sampayojesuṃ tatreko bhikkhu accasarā atha kho bhante so bhikkhu tassa bhikkhuno santike accayaṃ accayato deseti so bhikkhu na paṭiggaṇhātīti.

Dveme bhikkhave bālā . yo ca accayaṃ accayato na passati yo ca accayaṃ desentassa yathādhammaṃ na paṭiggaṇhāti . Ime kho bhikkhave dve bālā . dveme bhikkhave paṇḍitā . Yo ca accayaṃ accayato passati yo ca accayaṃ desentassa yathādhammaṃ paṭiggaṇhāti. Ime kho bhikkhave dve paṇḍitā.

Bhūtapubbaṃ bhikkhave sakko devānamindo sudhammāyaṃ sabhāyaṃ deve tāvatiṃse anunayamāno tāyaṃ velāyaṃ imaṃ gāthaṃ abhāsi kodho vo vasamāyātu mā ca mitte hi vo jarā agarahiyaṃ mā garahittha mā ca bhāsittha pesuṇaṃ atha pāpajanaṃ kodho pabbatovābhimaddatīti.