๑. มิคชาลสูตร ที่ ๑

7. 2. Migajālavagga

1. Paṭhamamigajālasuttavaṇṇanā

Migajālavaggassa paṭhame cakkhuviññeyyāti cakkhuviññāṇena passitabbā. Sotaviññeyyādīsupi eseva nayo. Iṭṭhāti pariyiṭṭhā vā hontu mā vā iṭṭhārammaṇabhūtāti attho. Kantāti kamanīyā. Manāpāti manavaḍḍhanakā. Piyarūpāti

@Footnote: 1 ka. anekattaṭṭhena Piyajātikā. Kāmūpasañhitāti ārammaṇaṃ katvā uppajjamānena kāmena upasañhitā. Rajanīyāti rañjanīyā, rāguppattikāraṇabhūtāti attho. Nandīti taṇhānandī. Saññogoti saññojanaṃ. Nandisaññojanasaṃyuttoti nandībandhanena baddho. Araññavanapatthānīti araññāni ca vanapatthāni ca. Tattha kiñcāpi abhidhamme nippariyāyena "nikkhamitvā bahi indakhīlā sabbametaṃ araññan"ti 1- vuttaṃ, tathāpi yantaṃ "pañcadhanusatikaṃ pacchiman"ti 2- araññakaṅganipphādakaṃ senāsanaṃ vuttaṃ. Tadeva adhippetanti veditabbaṃ. Vanapatthanti gāmantaṃ atikkamitvā manussānaṃ anupacāraṭṭhānaṃ, yattha na kasiyati na vapiyati. Vuttampi cetaṃ:-

"vanapatthanti dūrānametaṃ senāsanānaṃ adhivacanaṃ.

Vanapatthanti vanasaṇṭhānametaṃ, vanapatthanti bhiṃsanakānametaṃ,

vanapatthanti salomahaṃsānametaṃ, vanapatthanti pariyantānametaṃ,

vanapatthanti amanussūpacārānaṃ senāsanānametaṃ adhivacanan"ti. 3-

Ettha pariyantānanti imaṃ ekaṃ pariyāyaṃ ṭhapetvā sesapariyāyehi vanapatthanāni veditabbāni. Pantānīti pariyantāni atidūrāni. Appasaddānīti udukkhalamusaladārakasaddādīnaṃ 4- abhāvena appasaddāni. Appanigghosānīti tesaṃ tesaṃ ninnādamahānigghosassa abhāvena appanigghosāni. Vijanavātānīti sañcaraṇajanassa sarīravātavirahitāni. Manussarāhaseyyakānīti manussānaṃ raho kammassa anucchavikāni. Paṭisallānasāruppānīti nilīyanasāruppāni.