๙. ผัสสายตนสูตร ที่ ๑

Yo hi koci bhikkhave bhikkhu channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānāti avusitantena brahmacariyaṃ ārakā so imasmā dhammavinayāti. Evaṃ vutte aññataro bhikkhu bhagavantaṃ etadavoca etthāhaṃ bhante anassāsaṃ 1- ahaṃ hi bhante channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānāmīti. {85.1} Taṃ kiṃ maññasi bhikkhu cakkhuṃ etaṃ mama @Footnote: 1 Ma. anassasaṃ. Yu. anassāsī. Esohamasmi eso me attāti samanupassasīti . no hetaṃ bhante. Sādhu bhikkhu ettha ca te bhikkhu cakkhuṃ netaṃ mama nesohamasmi na meso attāti evametaṃ yathābhūtaṃ sammappaññāya sudiṭṭhaṃ bhavissati esevanto dukkhassa .pe. jivhaṃ etaṃ mama esohamasmi eso me attāti samanupassasīti . no hetaṃ bhante . sādhu bhikkhu ettha ca te bhikkhu jivhaṃ netaṃ mama nesohamasmi na meso attāti evametaṃ yathābhūtaṃ sammappaññāya sudiṭṭhaṃ bhavissati esevanto dukkhassa .pe. manaṃ etaṃ mama esohamasmi eso me attāti samanupassasīti . no hetaṃ bhante . sādhu bhikkhu ettha ca te bhikkhu mano netaṃ mama nesohamasmi na meso attāti evametaṃ yathābhūtaṃ sammappaññāya sudiṭṭhaṃ bhavissati esevanto dukkhassāti. Navamaṃ.