๑๐. อุทกสูตร

๑๐. อุทกสุตฺตวณฺณนา

ทสเม อุทโก สุทนฺติ เอตฺถ สุทนฺติ นิปาตมตฺตํ. อุทโกติ ตสฺส นามํ. อิทํ ชาตุ เวทคูติ เอตฺถ อิทนฺติ นิปาตมตฺตํ. อถวา อิทํ มม วจนํ สุณาถาติ ทีเปนฺโต เอวมาห. ชาตุ เวทคูติ อหํ เอกํเสน เวทคู, เวทสงฺขาเตน ญาเณน เนยฺเยสุ คโต, เวทํ วา คโต อธิคโต, ปณฺฑิโต อสฺมีติ ๑- อตฺโถ. สพฺพชฺชีติ เอกํเสน สพฺพํ วฏฺฏํ ชินิตฺวา อภิภวิตฺวา ฐิโตสฺมีติ วทติ. อปลิขตํ คณฺฑมูลนฺติ อขตํ ๒- ทุกฺขมูลํ. ปลิขณินฺติ ปลิขตํ มยา, ขณิตฺวา ฐิโตสฺมีติ ทีเปติ.

มาตาเปตฺติกสมฺภวสฺสาติ มาติโต จ ปิติโต จ นิพฺภเตน มาตาเปตฺติเกน สุกฺกโสณิเตน สมฺภูตสฺส. โอทนกุมฺมาสูปจยสฺสาติ โอทเนน เจว กุมฺมาเสน จ อุปจิตสฺส วฑฺฒิตสฺส. อนิจฺจุจฺฉาทนปริมทฺทนเภทนวิทฺธํสนธมฺมสฺสาติ เอตฺถ อยํ กาโย หุตฺวา อภาวฏฺเฐน อนิจฺจธมฺโม, ทุคฺคนฺธวิฆาตตฺถาย คนฺธวิเลปเนน ๓- อุจฺฉาทนธมฺโม, องฺคปจฺจงฺคาพาธวิโนทนตฺถาย อุทกสมฺพาหเนน ๔- ปริมทฺทนธมฺโม, ทหรกาเล วา อูรูสุ สยาเปตฺวา คพฺภวาเสน ทุสฺสณฺฐิตานํ เตสํ เตสํ องฺคานํ สณฺฐานสมฺปาทนตฺถํ อญฺชนปีฬนาทิวเสน ปริมทฺทนธมฺโม, เอวํ ปริหริโตปิ จ เภทนวิทฺธํสนธมฺโม ภิชฺชติ เจว วิกิรติ จ, เอวํ สภาโวติ อตฺโถ.

ตตฺถ มาตาเปตฺติกสมฺภวโอทนกุมฺมาสูปจยปริมทฺทนปเทหิ วุฑฺฒิ กถิตา, อนิจฺจเภทนวิทฺธํสนปเทหิ ปริหานิ. ปุริเมหิ วา ตีหิ สมุทโย, ปจฺฉิเมหิ อตฺถงฺคโมติ. เอวํ จาตุมหาภูติกสฺส กายสฺส วุฑฺฒิปริหานินิพฺพตฺติเภทา ทสฺสิตา. เสสํ อุตฺตานตฺถเมวาติ.

สฬวคฺโค ปญฺจโม.

ทุติโย ปณฺณาสโก.

@เชิงอรรถ: ๑ ฉ.ม. ปณฺฑิโตหมสฺมีติ ๒ ฉ.ม. อปริขตํ, ฏีกา. อวขตํ

@๓ ฉ.ม. ตนุวิเลปเนน ๔ ฉ.ม. ขุทฺทกสมฺพาหเนน