อิจฉานังคลสูตร

2. Dutiyavagga

1-2. Icchānaṅgalasuttādivaṇṇanā

[987-988] Dutiyavaggassa paṭhame evaṃ byākareyyāthāti kasmā attano vihārasamāpattiṃ ācikkhati? upārambhamocanatthaṃ. Sace hi te "na jānāmā"ti vadeyyuṃ, atha nesaṃ titthiyā "tumhe `asukasamāpattiyā nāma no satthā temāsaṃ vihāsī'tipi na jānātha, atha kasmā naṃ upaṭṭhahantā viharathā"ti upārambhaṃ āropeyyuṃ, tato mocanatthaṃ evamāha.

Atha kasmā yathā aññattha "satova assasati, dīghaṃ vā assasanto"ti 1- evavākāro vutto, evaṃ idha na vuttoti? ekantasantattā. Aññesañhi assāso vā pākaṭo hoti passāso vā, bhagavato ubhayaṃ cetaṃ 2- pākaṭameva niccaṃ upaṭṭhitassatitāyāti ekantasantatā na vutto. Atha "sikkhāmī"ti avatvā kasmā "assasāmī"ti ettakameva vuttanti? sikkhitabbābhāvā. Satta hi sekhā sikkhitabbabhāvā sekhā nāma, khīṇāsavā asikkhitabbābhāvā asekhā nāma, tathāgatā asikkhitabbā asekhā nāma natthi tesaṃ sikkhitabbakiccanti sikkhitabbābhāvā na vuttaṃ. Dutiyaṃ uttānameva.

@Footnote: 1 dī.mahā. 10/374/248, Ma.mū. 12/107/77, saṃ.mahā. 19/977/269 2 cha.Ma. ubhayampetaṃ