สิกขาบทที่ ๒ เรื่องพระอุปนันทศากยบุตร

{274} Dutiyasikkhāpade. Paṭikkamanepīti āsanasālāyaṃpi. Bhattavissagganti bhattakiccaṃ. Na sambhāvesīti na pāpuṇi. {276} Anācāranti vuttāvasesaṃ kāyavacīdvāravītikkamaṃ. Dassanūpacāraṃ vā savanūpacāraṃ vā vijahantassāti ettha yadi ṭhito vā nisinno vā uyyojeti yo uyyojito so vijahati tassa ca āpatti nāma natthi tasmiṃ pana vijahantepi atthato itarena vijahitameva hoti tasmā yo uyyojeti tassevāyaṃ āpatti. Tattha sace upacārabbhantare eko pādo hoti dukkaṭaṃ sīmātikkame pācittiyaṃ. Ettha ca dassanūpacārassa ajjhokāse dvādasahatthappamāṇaṃ tathā savanūpacārassa. Sace pana antarā kuḍḍadvārapākārādayo honti tehi antaritabhāvoyeva dassanūpacārātikkamo. Tassa vasena āpatti veditabbā. Na añño koci paccayo hotīti ṭhapetvā vuttappakāramanācāraṃ aññaṃ kiñci kāraṇaṃ na hoti. {277} Kalisāsanaṃ āropetīti 1- kalīti kodho. Tassa sāsanaṃ āropeti. Kodhassa āṇaṃ āropeti. Kodhavasena ṭhānanissajjādīsa dosaṃ dassetvā passatha bho imassa ṭhānaṃ nissajjaṃ ālokitaṃ vilokitaṃ khāṇu viya tiṭṭhati sunakho viya nisīdati makkaṭo viya itocītoca viloketīti evaṃ amanāpavacanaṃ vadati appeva nāma imināpi ubbāḷho pakkameyyāti. Sesaṃ uttānamevāti.

Tisamuṭṭhānaṃ kāyacittato vācācittato kāyavācācittato ca

@Footnote: 1. āroceti. Samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ tivedananti.

Uyyojanasikkhāpadaṃ dutiyaṃ.