สิกขาบทที่ ๔ เรื่องพระฉันนะ

{342} Catutthasikkhāpade. Kathāyaṃ nasseyyāti kathaṃ ayaṃ dhammo tanti paveṇi nasseyya. Taṃ vā na sikkhitukāmoti yena paññattena vuccati taṃ paññattaṃ na sikkhitukāmo. Appaññattenāti sutte vā abhidhamme vā āgatena. {344} Evaṃ amhākaṃ ācariyānaṃ uggahoti ettha gārayho ācariyuggaho na gahetabbo. Paveṇiyā āgato ācariyuggahova gahetabbo. Kurundiyaṃ lokavajje ācariyuggaho na vaṭṭati paṇṇattivajje pana vaṭṭatīti vuttaṃ. Mahāpaccariyaṃ suttaṃ suttānulomaṃ ca uggahitakānaṃyeva ācariyānaṃ uggaho pamāṇaṃ ajānantānaṃ kathā appamāṇanti vuttaṃ. Taṃ sabbaṃ paveṇiyā āgate samodhānaṃ gacchati. Sesaṃ uttānameva. Tisamuṭṭhānaṃ Kāyacittato vācācittato kāyavācācittato ca samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dukkhavedananti.

Anādariyasikkhāpadaṃ catutthaṃ.