วรรคที่ ๖ สุรุสุรุวรรค

{627} Surusurukārakanti surusurūti evaṃ saddaṃ katvā katvā. Davoti parihāsavacanaṃ. Taṃ yena kenaci pariyāyena kiṃbuddho silakabuddho paṭibuddho kiṃdhammo godhammo ajadhammo kiṃsaṅgho migasaṅgho pasusaṅghotiādinā nayena tīṇi ratanāni ārabbha na kattabbanti attho.

{628} Hatthanillehakanti hatthaṃ nillehitvā nillehitvā. Bhuñjantena hi aṅgulīmattaṃpi nillehituṃ na vaṭṭati. Ghanayāguphāṇitapāyāsādike pana aṅgulīhi gahetvā aṅgulīyo mukhe pavesetvā bhuñjituṃ vaṭṭati. Pattanillehakaoṭṭhanillehakāsupi 1- eseva nayo. Tasmā ekaṅguliyāpi patto na nillehitabbo. Ekaoṭṭhopi jivhāya na nillehitabbo. Oṭṭhamaṃsehiyeva pana gahetvā anto pavesetuṃ vaṭṭati.

{631} Kokanadeti evaṃnāmake. Kokanadanti padumaṃ vuccati. So ca pāsādo padumasaṇṭhāno kato. Tenassa kokanadotveva nāmaṃ akaṃsu. Na sāmisena hatthena pānīyathālakanti etaṃ paṭikūlavasena paṭikkhittaṃ. Tasmā saṅghikaṃpi puggalikaṃpi gihisantakaṃpi attano santakaṃpi saṅkhaṃpi sarāvakaṃpi thālakaṃpi na gahetabbameva. Gaṇhantassa dukkaṭaṃ. Sace pana hatthassa ekadeso āmisamakkhito na hoti tena padesena gahetuṃ vaṭṭati. {632} Uddharitvā vāti sitthāni udakato uddharitvā ekasmiṃ ṭhāne rāsiṃ katvā udakaṃ chaḍḍeti. Bhinditvā vāti sitthāni bhinditvā udakagatikāni katvā chaḍḍeti. Paṭiggahe vāti

@Footnote: 1. nillehakesu. Paṭiggahena paṭicchanto naṃ paṭiggahe chaḍḍeti 1-. Nīharitvāti bahi nīharitvā chaḍḍeti. Evaṃ chaḍḍentassa anāpatti.

{634} Setacchattanti vatthapaliguṇṭhitaṃ paṇḍaracchattaṃ. Kilañjacchattanti vilīvacchattaṃ. Paṇṇacchattanti tālapaṇṇādīhi yehi kehici kataṃ. Maṇḍalabaddhaṃ sasākabaddhanti idaṃ pana tiṇṇaṃpi chattānaṃ pañjaradassanatthaṃ vuttaṃ. Tāni hi maṇḍalabaddhāni ceva honti salākabaddhāni ca. Yaṃpi tattha jātakadaṇḍakena kataṃ ekapaṇṇacchattaṃ hoti taṃpi chattameva. Etesu yaṅkiñci chattaṃ pāṇimhi assāti chattapāṇi. So taṃ chattaṃ dhārayamāno vā aṃse vā katvā ūrumhi vā ṭhapetvā yāva hatthena na muñcati tāvassa dhammaṃ desetuṃ na vaṭṭati. Desentassa vuttanayeneva dukkaṭaṃ. Sace panassa añño chattaṃ dhāreti chattapādukāya vā ṭhitaṃ hoti hatthato apagatamatte chatte chattapāṇi nāma na hoti tassa dhammaṃ desetuṃ vaṭṭati. Dhammaparicchedo panettha padasodhamme vuttanayeneva veditabbo. {635} Daṇḍapāṇissāti ettha daṇḍo nāma majjhimassa purisassa catūhatthappamāṇo. Daṇḍapāṇibhāvo panassa chattapāṇimhi vuttanayeneva veditabbo. {636} Satthapāṇimhipi eseva nayo. Asiṃ sannahitvā ṭhitopi hi satthapāṇisaṅkhyaṃ na gacchati.

{637} Āvudhapāṇissāti ettha kiñcāpi vuttaṃ āvudhaṃ nāma cāpo

@Footnote: 1. paṭiggahe vāti ettha paṭiggaho nāma ujjhiṭṭhapaṭiggahaṇabhājanaṃ. tattha pakkhipitvā

@nīharitvā chaḍḍetīti amhākaṃ khanti. Kodaṇḍoti athakho sabbāpi dhanuvikati saddhiṃ saravikatiyā āvudhanti veditabbā. Tasmā saddhiṃ vā sarena dhanuṃ gahetvā suddhadhanuṃ vā suddhasaraṃ vā sajiyadhanuṃ vā nijjiyadhanuṃ vā gahetvā ṭhitassa vā nisinnassa vā dhammaṃ desetuṃ na vaṭṭati. Sace panassa dhanu kaṇṭhepi paṭimukkaṃ hoti yāva hatthena na gaṇhāti tāva dhammaṃ desetuṃ vaṭṭatiyevāti.

Chaṭṭho vaggo.