สิกขาบทที่ ๑๐ เรื่องพระอุปนันทศากยบุตร

TIPITAKA Volume 2 : PALI ROMAN Vinaya Pitaka Vol 2 : Vinaya. Mahāvi (2) Dasamasikkhāpadaṃ

[113] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmā upanando sakyaputto paṭṭho hoti cīvarakammaṃ kātuṃ . so paṭapilotikānaṃ saṅghāṭiṃ karitvā surattaṃ suparikammakataṃ katvā pārupi . athakho aññataro paribbājako mahagghaṃ paṭaṃ pārupitvā yenāyasmā upanando sakyaputto tenupasaṅkami upasaṅkamitvā āyasmantaṃ upanandaṃ sakyaputtaṃ etadavoca sundarā kho tyāyaṃ āvuso saṅghāṭi 1- dehi me paṭenāti. Jānāhi āvusoti. Āmāvuso jānāmīti. Handāvusoti adāsi. {113.1} Athakho so paribbājako taṃ saṅghāṭiṃ pārupitvā paribbājakārāmaṃ agamāsi . paribbājakā taṃ paribbājakaṃ etadavocuṃ sundarā kho tyāyaṃ āvuso saṅghāṭi kuto tayā laddhāti . tena me āvuso paṭena parivaṭṭitāti 2- . katihipi tyāyaṃ āvuso saṅghāṭi bhavissati soyeva te paṭo varoti . Athakho so paribbājako saccaṃ kho paribbājakā āhaṃsu katihipi myāyaṃ saṅghāṭi bhavissati soyeva me paṭo varoti yenāyasmā upanando sakyaputto tenupasaṅkami upasaṅkamitvā āyasmantaṃ upanandaṃ sakyaputtaṃ etadavoca handa te āvuso saṅghāṭiṃ 3- dehi me paṭanti . nanu tvaṃ āvuso mayā vutto jānāhi @Footnote: 1 Yu. saṅghāṭī . 2 Ma. Yu. sabbattha parivattitātīti dissati . 3 Ma. saṅghāṭi. Āvusoti nāhaṃ dassāmīti . athakho so paribbājako ujjhāyati khīyati vipāceti gihipi 1- naṃ gihissa vippaṭisārissa deti 2- kiṃ pana pabbajito pabbajitassa na dassatīti . assosuṃ kho bhikkhū tassa paribbājakassa ujjhāyantassa khīyantassa vipācentassa . ye te bhikkhū appicchā .pe. te ujjhāyanti khīyanti vipācenti kathaṃ hi nāma āyasmā upanando sakyaputto paribbājakena saddhiṃ kayavikkayaṃ samāpajjissatīti . Athakho te bhikkhū bhagavato etamatthaṃ ārocesuṃ. Saccaṃ kira tvaṃ upananda paribbājakena saddhiṃ kayavikkayaṃ samāpajjasīti . saccaṃ bhagavāti . Vigarahi buddho bhagavā kathaṃ hi nāma tvaṃ moghapurisa paribbājakena saddhiṃ kayavikkayaṃ samāpajjissasi netaṃ moghapurisa appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {113.2} yo pana bhikkhu nānappakārakaṃ kayavikkayaṃ samāpajjeyya nissaggiyaṃ pācittiyanti.