สิกขาบทที่ ๓ เรื่องพระทัพพมัลลบุตร

{103} Tatiyasikkhāpade. Dabbaṃ mallaputtaṃ bhikkhū ujjhāpentīti chandāya dabbo mallaputtoti ādīni vadantā taṃ āyasmantaṃ tehi bhikkhūhi avajānāpenti avaññāya olokāpenti lāmakato vā cintāpentīti attho. Lakkhaṇaṃ panettha saddasatthānusārena veditabbaṃ. Ojjhāpentītipi pāṭho. Ayameva attho. Chandāyāti chandena pakkhapātena. Tena attano sandiṭṭhasambhattānaṃ paṇītāni paññāpetīti adhippāyo. Khiyyantīti chandāya dabbo mallaputtoti Ādīni vadantā pakāsenti. {105} Ujjhāpanake khiyyanake pācittiyanti ettha yena vacanena ujjhāpenti taṃ ujjhāpanakaṃ. Yena ca khiyyanti taṃ khīyanakaṃ. Tasmiṃ ujjhāpanake khīyanake. Pācittiyanti vatthudvaye pācittiyadvayaṃ vuttaṃ. {106} Ujjhāpanakaṃ nāma upasampannaṃ saṅghena sammataṃ senāsanapaññāpakaṃ vā .pe. Appamattakavissajjakaṃ vāti etesaṃ padānaṃ maṅkukattukāmoti iminā sambandho. Avaṇṇaṃ kattukāmo ayasaṃ kattukāmoti imesaṃ padānaṃ vasena upasampannanti ādīsu upasampannassāti evaṃ vibhattipariṇāmo kātabbo. Ujjhāpeti vā khiyyati vā āpatti pācittiyassāti ettha pana yasmā khīyanakaṃ nāmāti evaṃ mātikāpadaṃ uddharitvāpi ujjhāpanakaṃ nāmāti imassa padassa vuttavibhaṅgoyeva vattabbo hoti aññavādakasikkhāpade viya añño viseso natthi tasmā taṃ visuṃ anuddharitvā avibhajitvāpi nigamanameva ekato katanti veditabbaṃ. Dhammakamme dhammakammasaññīti ādīsu yaṃ tassa upasampannassa sammatikammaṃ kataṃ tañce dhammakammaṃ hoti so ca bhikkhu tasmiṃ dhammakammasaññī ujjhāpanakañca khīyanakañca karoti athassa tasmiṃ ujjhāpanake ca khīyanake ca āpatti pācittiyassāti iminā nayena attho veditabbo. Anupasampannaṃ ujjhāpeti vā khiyyati vāti ettha upasampannaṃ saṅghena sammataṃ aññaṃ anupasampannaṃ ujjhāpeti vā avajānāpeti tassa vā naṃ santike khiyyatīti attho. Upasampannaṃ saṅghena asammatanti kammavācāya asammataṃ. Kevalaṃ Taveso bhāroti saṅghena āropitabhāraṃ bhikkhūnaṃ vā phāsuvihāratthāya sayameva taṃ bhāraṃ vahantaṃ. Yatra vā dve tayo bhikkhū viharanti tatra tādisaṃ kammaṃ karontanti adhippāyo. Anupasampannaṃ saṅghena sammataṃ vā asammataṃ vāti ettha pana kiñcāpi anupasampannassa terasa sammatiyo dātuṃ na vaṭṭati athakho upasampannakāle laddhasammatiko pacchā anupasampannabhāve ṭhito taṃ sandhāya saṅghena sammataṃ vāti vuttaṃ. Yassa pana byattassa sāmaṇerassa kevalaṃ saṅghena vā sammatena vā bhikkhunā tvaṃ idaṃ kammaṃ karohīti bhāro kato tādisaṃ sandhāya asammataṃ vāti vuttaṃ. Sesaṃ uttānameva. Tisamuṭaṭhānaṃ kāyacittato vācācittato kāyavācācittato ca samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dukkhavedananti.

Ujjhāpanasikkhāpadaṃ tatiyaṃ.