สิกขาบทที่ ๘ เรื่องภิกษุ ๒ รูป

{๑๒๙} อฏฺฐมสิกฺขาปเท ฯ อุปริ เวหาสกุฏิยาติ อุปริ อจฺฉนฺนตลาย ทฺวิภูมิกกุฏิยา วา ติภูมิกาทิกุฏิยา วา ฯ มญฺจํ สหสา อภินิสีทตีติ มญฺจํ สหสา อภิภวิตฺวา อชฺโฌตฺถริตฺวา นิสีทิ ฯ ภุมฺมตฺเถ วา เอตํ อุปโยควจนํ ฯ มญฺเจ นิสีทตีติ อตฺโถ ฯ อภีติ อิทํ ปน ปทโสภนตฺถํ อุปสคฺคมตฺตเมว ฯ ปติตฺวาติ นิปติตฺวา นิกฺขมิตฺวา วา ฯ ตสฺส หิ อุปริ อาณิปิ น ทินฺนา ตสฺมา นิกฺขนฺโต ฯ วิสฺสรมกาสีติ วิรูปํ อาตุรสฺสรํ อกาสิ ฯ {๑๓๑} เวหาสกุฏี นาม มชฺฌิมสฺส ปุริสสฺส อสีสฆฏฺฏาติ ยา ปมาณมชฺฌิมสฺส ปุริสสฺส สพฺพเหฏฺฐิมาหิ ตุลาหิ สีสํ น ฆฏฺเฏติ ฯ เอเตน อิธ อธิปฺเปตเวหาสกุฏิ ทสฺสิตา โหติ ฯ น เวหาสกุฏิลกฺขณํ ทสฺสิตํ ฯ ยา หิ กาจิ อุปริ อจฺฉนฺนตลา ทฺวิภูมิกา กุฏี วา ติภูมิกาทิกุฏี วา เวหาสกุฏีติ วุจฺจติ ฯ อิธ ปน อสีสฆฏฺฏา อธิปฺเปตา ฯ อภินิสีทนาทีสุ ปุพฺเพ วุตฺตนเยเนว ปโยควเสน อาปตฺติเภโท เวทิตพฺโพ ฯ {๑๓๓} อเวหาสกุฏิยาติ ภูมิยํ กตปณฺณสาลาทีสุ อนาปตฺติ ฯ น หิ สกฺกา ตตฺถ ปรสฺส ปีฬา กาตุํ ฯ สีสฆฏฺฏายาติ ยา สีสฆฏฺฏา โหติ ตตฺถาปิ อนาปตฺติ ฯ น หิ สกฺกา ตตฺถ เหฏฺฐาปาสาเท อโนนเตน วิจริตุํ ตสฺมา อสญฺจรณฏฺฐานตฺตา ปรสฺส ปีฬา น ภวิสฺสติ ฯ เหฏฺฐา อปริโภคํ โหตีติ ยสฺมา เหฏฺฐา ทพฺพสมฺภาราทีนํ นิกฺขิตฺตตฺตา อปริโภคํ โหติ ตตฺถาปิ อนาปตฺติ ฯ ปทรสญฺจิตํ โหตีติ ยสฺสา อุปริ ตลํ ทารุผลเกหิ วา ฆนสนฺถตํ โหติ สุธาทิปริกมฺมกตํ วา ตตฺถาปิ อนาปตฺติ ฯ ปฏฺฏาณิ ทินฺนา โหตีติ มญฺจปีฐาทีนํ ปาทสิขาสุ อาณิ ทินฺนา โหติ ฯ ยตฺถ นิสีทนฺเตปิ น นิปตนฺติ ตาทิเส มญฺจปีเฐ นิสีทโตปิ อนาปตฺติ ฯ ตสฺมึ ฐิโตติ อาหจฺจปาทเก มญฺเจ วา ปีเฐ วา ฐิโต อุปริ นาคทนฺตกาทีสุ ลคฺคิตกํ จีวรํ วา กิญฺจิ วา คณฺหาติ อญฺญํ วา ลคฺเคติ ตสฺสาปิ อนาปตฺติ ฯ เสสํ อุตฺตานเมว ฯ เอฬกโลมสมุฏฺฐานํ กายโต จ กายจิตฺตโต จ สมุฏฺฐาติ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ ติจิตฺตํ ติเวทนนฺติ ฯ

เวหาสกุฏีสิกฺขาปทํ อฏฺฐมํ ฯ