สิกขาบทที่ ๘ เรื่องภิกษุ ๒ รูป

{129} Aṭṭhamasikkhāpade. Upari vehāsakuṭiyāti upari acchannatalāya dvibhūmikakuṭiyā vā tibhūmikādikuṭiyā vā. Mañcaṃ sahasā abhinisīdatīti mañcaṃ sahasā abhibhavitvā ajjhottharitvā nisīdi. Bhummatthe Vā etaṃ upayogavacanaṃ. Mañce nisīdatīti attho. Abhīti idaṃ pana padasobhanatthaṃ upasaggamattameva. Patitvāti nipatitvā nikkhamitvā vā. Tassa hi upari āṇipi na dinnā tasmā nikkhanto. Vissaramakāsīti virūpaṃ āturassaraṃ akāsi. {131} Vehāsakuṭī nāma majjhimassa purisassa asīsaghaṭṭāti yā pamāṇamajjhimassa purisassa sabbaheṭṭhimāhi tulāhi sīsaṃ na ghaṭṭeti. Etena idha adhippetavehāsakuṭi dassitā hoti. Na vehāsakuṭilakkhaṇaṃ dassitaṃ. Yā hi kāci upari acchannatalā dvibhūmikā kuṭī vā tibhūmikādikuṭī vā vehāsakuṭīti vuccati. Idha pana asīsaghaṭṭā adhippetā. Abhinisīdanādīsu pubbe vuttanayeneva payogavasena āpattibhedo veditabbo. {133} Avehāsakuṭiyāti bhūmiyaṃ katapaṇṇasālādīsu anāpatti. Na hi sakkā tattha parassa pīḷā kātuṃ. Sīsaghaṭṭāyāti yā sīsaghaṭṭā hoti tatthāpi anāpatti. Na hi sakkā tattha heṭṭhāpāsāde anonatena vicarituṃ tasmā asañcaraṇaṭṭhānattā parassa pīḷā na bhavissati. Heṭṭhā aparibhogaṃ hotīti yasmā heṭṭhā dabbasambhārādīnaṃ nikkhittattā aparibhogaṃ hoti tatthāpi anāpatti. Padarasañcitaṃ hotīti yassā upari talaṃ dāruphalakehi vā ghanasanthataṃ hoti sudhādiparikammakataṃ vā tatthāpi anāpatti. Paṭṭāṇi dinnā hotīti mañcapīṭhādīnaṃ pādasikhāsu āṇi dinnā hoti. Yattha nisīdantepi na nipatanti tādise mañcapīṭhe nisīdatopi anāpatti. Tasmiṃ ṭhitoti āhaccapādake mañce vā pīṭhe vā ṭhito upari nāgadantakādīsu laggitakaṃ cīvaraṃ vā kiñci vā gaṇhāti aññaṃ vā laggeti tassāpi anāpatti. Sesaṃ uttānameva. Eḷakalomasamuṭṭhānaṃ kāyato ca kāyacittato ca samuṭṭhāti kiriyā nosaññāvimokkhaṃ acittakaṃ paṇṇattivajjaṃ kāyakammaṃ ticittaṃ tivedananti.

Vehāsakuṭīsikkhāpadaṃ aṭṭhamaṃ.