ชนสูตร ที่ ๑

52 Ekaṃ samayaṃ bhagavā sāvatthiyaṃ viharati anāthapiṇḍikassa ārāme . athakho dve brāhmaṇā jiṇṇā vuḍḍhā mahallakā addhagatā vayoanuppattā vīsavassasatikā jātiyā yena bhagavā tenupasaṅkamiṃsu upasaṅkamitvā bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu ekamantaṃ nisinnā kho te brāhmaṇā bhagavantaṃ etadavocuṃ mayamassu bho gotama brāhmaṇā jiṇṇā vuḍḍhā mahallakā addhagatā vayoanuppattā vīsavassasatikā jātiyā te camha 1- akatakalyāṇā akatakusalā akatabhīruttāṇā ovadatu no bhavaṃ gotamo anusāsatu no bhavaṃ gotamo yaṃ amhākaṃ assa dīgharattaṃ hitāya sukhāyāti . taggha tumhe brāhmaṇā jiṇṇā vuḍḍhā mahallakā addhagatā vayoanuppattā vīsavassasatikā jātiyā te cattha akatakalyāṇā akatakusalā akatabhīruttāṇā upanīyati kho ayaṃ brāhmaṇā loko jarāya byādhinā maraṇena evaṃ upanīyamāne kho brāhmaṇā loke jarāya byādhinā maraṇena yo idha kāyena saññamo vācāya saññamo manasā saññamo taṃ tassa petassa tāṇañca lenañca dīpañca saraṇañca parāyanañcāti. @Footnote: 1 Po. Ma. Yu. camhā. Upanīyati jīvitamappamāyuṃ 1- jarūpanītassa na santi tāṇā etaṃ bhayaṃ maraṇe pekkhamāno puññāni kayirātha sukhāvahāni. Yodha kāyena saññamo vācāya uda cetasā taṃ tassa petassa sukhāya hoti yaṃ jīvamāno pakaroti puññanti.