นิสันติสูตร

7. Khippanisantisuttavaṇṇanā

Sattame khippanisantīti khippanisāmano 1- sīghaṃ jānituṃ samattho. Sutānañca dhammānanti sutapaguṇānaṃ 2- tantidhammānaṃ. Atthupaparikkhīti atthaṃ upaparikkhako. Atthamaññāya dhammamaññāyāti aṭṭhakathañca pāliñca jānitvā. Dhammānudhammapaṭipanno hotīti navannaṃ lokuttaradhammānaṃ anurūpadhammabhūtaṃ sasīlakaṃ pubbabhāgapaṭipadaṃ paṭipanno hoti. No ca kalyāṇavāco hotīti na sundaravacano hoti. Na kalyāṇavākkaraṇoti na sundaravacanaghoso hoti. Poriyātiādīhi saddhiṃ nokāro yojetabboyeva. Guṇaparipuṇṇāya apalibuddhāya adosāya aggalitapadabyañjanāya atthaṃ viññāpetuṃ samatthāya vācāya samannāgato na hotīti attho. Iminā upāyena sabbattha attho veditabbo.