๑. สัปปุริสวรรค

5. Pañcamapaṇṇāsaka

21. 1. Sappurisavagga

1. Sikkhāpadasuttavaṇṇanā

Pañcamassa paṭhame asappurisanti lāmakapurisaṃ tucchapurisaṃ mūḷhapurisaṃ avijjāya andhīkataṃ bahalaṃ. Asappurisataranti atirekena asappurisaṃ. Itare dve vuttapaṭipakkhavasena veditabbā. Sesamettha uttānatthameva. Yathā cettha, evaṃ ito puresu pañcasu. Etesu hi paṭhamaṃ pañcaveravasena desitaṃ, dutiyaṃ asaddhammavasena, tatiyaṃ kāyavacīdvāravasena, catutthaṃ manodvāravasena, pañcamaṃ aṭṭhamicchattavasena, chaṭṭhaṃ dasamicchattavasena.

7-10. Pāpadhammasuttacatukkavaṇṇanā

[207-210] Sattame pāpanti lāmakaṃ saṅkiliṭṭhapuggalaṃ. Kalyāṇanti bhaddakaṃ anavajjapuggalaṃ. Sesamettha uttānameva. Aṭṭhamepi eseva nayo. Navame pāpadhammanti lāmakadhammaṃ. Kalyāṇadhammanti anavajjadhammaṃ. Sesamettha uttānameva. Dasamepi eseva nayo. Imasmiṃ vagge dasasupi suttesu agāriyapaṭipadā kathitā. Sacepi sotāpanna- sakadāgāmino honti, vaṭṭatiyevāti.

Sappurisavaggo paṭhamo.