๖. อภิญญาวรรค

๒๖. ๖. อภิญฺญาวคฺค

๑-๓. อภิญฺญาสุตฺตาทิวณฺณนา

[๒๕๔-๒๕๖] ฉฏฺฐสฺส ปฐเม อภิญฺญายาติ ชานิตฺวา. สมโถ จ วิปสฺสนา จาติ จิตฺเตกคฺคตา จ สงฺขารปริคฺคหวิปสฺสนาญาณญฺจ. วิชฺชา จ วิมุตฺติ จาติ มคฺคญาณวิชฺชา จ เสสา สมฺปยุตฺตกธมฺมา จ. ทุติเย อนริยปริเยสนาติ อนริยานํ เอสนา คเวสนา. ชราธมฺมนฺติ ชราสภาวํ. เสเสสุปิ เอเสว นโย. ตติยํ อุตฺตานเมว.

๔. มาลุงฺกฺยปุตฺตสุตฺตวณฺณนา

จตุตฺเถ มาลุงฺกฺยปุตฺโตติ มาลุงฺกฺยพฺราหฺมณิยา ปุตฺโต. เอตฺถาติ เอตสฺมึ ตว โอวาทยาจเน. อิมินา เถรํ อปสาเทติปิ อุสฺสาเทติปิ. กถํ? อยํ กิร ทหรกาเล ปจฺจเยสุ ลคฺโค หุตฺวา ปจฺฉา มหลฺลกกาเล อรญฺญวาสํ ปตฺเถนฺโต กมฺมฏฺฐานํ ยาจติ. อถ ภควา "เอตฺถ ทหเร กึ วกฺขาม, มาลุงฺกฺยปุตฺโต วิย ตุเมฺหปิ ตรุณกาเล ปจฺจเยสุ ลคฺคิตฺวา มหลฺลกกาเล อรญฺญํ ปวิสิตฺวา สมณธมฺมํ กเรยฺยาถา"ติ อิมินา อธิปฺปาเยน ภณนฺโต เถรํ อปสาเทติ นาม. ยสฺมา ปน เถโร มหลฺลกกาเล อรญฺญํ ปวิสิตฺวา สมณธมฺมํ กตฺตุกาโม, ตสฺมา ภควา "เอตฺถ ทหเร กึ วกฺขาม, อยํ ตุมฺหากํ ๑- มาลุงฺกฺยปุตฺโต มหลฺลกกาเลปิ อรญฺญํ ปวิสิตฺวา สมณธมฺมํ กตฺตุกาโม กมฺมฏฺฐานํ ยาจติ. ตุเมฺห ตาว ตรุณกาเลปิ วิริยํ น กโรถา"ติ อิมินา อธิปฺปาเยน ภณนฺโต เถรํ อุสฺสาเทติ นามาติ โยชนา.

๕-๑๐. กุลสุตฺตาทิวณฺณนา

[๒๕๘-๒๖๓] ปญฺจเม อาธิปจฺเจ ฐเปนฺตีติ ภณฺฑาคาริกฏฺฐาเน ฐเปนฺติ. ฉฏฺเฐ วณฺณสมฺปนฺโนติ สรีรวณฺเณน สมนฺนาคโต. พลสมฺปนฺโนติ กายพเลน

@เชิงอรรถ: ๑ ฉ.ม. อมฺหากํ สมนฺนาคโต. ภิกฺขุ วาเร วณฺณสมฺปนฺโนติ คุณวณฺเณน สมนฺนาคโต. พลสมฺปนฺโนติ วิริยพเลน สมนฺนาคโต. ชวสมฺปนฺโนติ ญาณชเวน สมนฺนาคโต. สตฺตเมปิ เอเสว นโย. เสสเมตฺถ อุตฺตานเมวาติ.

อภิญฺญาวคฺโค ฉฏฺโฐ.