๖. อภิญญาวรรค

26. 6. Abhiññāvagga

1-3. Abhiññāsuttādivaṇṇanā

[254-256] Chaṭṭhassa paṭhame abhiññāyāti jānitvā. Samatho ca vipassanā cāti cittekaggatā ca saṅkhārapariggahavipassanāñāṇañca. Vijjā ca vimutti cāti maggañāṇavijjā ca sesā sampayuttakadhammā ca. Dutiye anariyapariyesanāti anariyānaṃ esanā gavesanā. Jarādhammanti jarāsabhāvaṃ. Sesesupi eseva nayo. Tatiyaṃ uttānameva.

4. Māluṅkyaputtasuttavaṇṇanā

Catutthe māluṅkyaputtoti māluṅkyabrāhmaṇiyā putto. Etthāti etasmiṃ tava ovādayācane. Iminā theraṃ apasādetipi ussādetipi. Kathaṃ? ayaṃ kira daharakāle paccayesu laggo hutvā pacchā mahallakakāle araññavāsaṃ patthento kammaṭṭhānaṃ yācati. Atha bhagavā "ettha dahare kiṃ vakkhāma, māluṅkyaputto viya tumhepi taruṇakāle paccayesu laggitvā mahallakakāle araññaṃ pavisitvā samaṇadhammaṃ kareyyāthā"ti iminā adhippāyena bhaṇanto theraṃ apasādeti nāma. Yasmā pana thero mahallakakāle araññaṃ pavisitvā samaṇadhammaṃ kattukāmo, tasmā bhagavā "ettha dahare kiṃ vakkhāma, ayaṃ tumhākaṃ 1- māluṅkyaputto mahallakakālepi araññaṃ pavisitvā samaṇadhammaṃ kattukāmo kammaṭṭhānaṃ yācati. Tumhe tāva taruṇakālepi viriyaṃ na karothā"ti iminā adhippāyena bhaṇanto theraṃ ussādeti nāmāti yojanā.

5-10. Kulasuttādivaṇṇanā

[258-263] Pañcame ādhipacce ṭhapentīti bhaṇḍāgārikaṭṭhāne ṭhapenti. Chaṭṭhe vaṇṇasampannoti sarīravaṇṇena samannāgato. Balasampannoti kāyabalena

@Footnote: 1 cha.Ma. amhākaṃ Samannāgato. Bhikkhu vāre vaṇṇasampannoti guṇavaṇṇena samannāgato. Balasampannoti viriyabalena samannāgato. Javasampannoti ñāṇajavena samannāgato. Sattamepi eseva nayo. Sesamettha uttānamevāti.

Abhiññāvaggo chaṭṭho.