๑๐. ขัตติยาธิปปายสูตร

TIPITAKA Volume 22 : PALI ROMAN Sutta Pitaka Vol 14 : Sutta. Aṅ. (3): pañcaka-chakkanipātā

[323] 52 Atha kho jāṇussoṇi brāhmaṇo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi ekamantaṃ nisinno kho jāṇussoṇi brāhmaṇo bhagavantaṃ etadavoca khattiyā bho gotama kimadhippāyā kiṃupavicārā kiṃadhiṭṭhānā kiṃabhinivesā kiṃpariyosānāti khattiyā kho brāhmaṇa bhogādhippāyā paññūpavicārā balādhiṭṭhānā paṭhavīabhinivesā issariyapariyosānāti. {323.1} Brāhmaṇā pana bho gotama kimadhippāyā kiṃupavicārā kiṃadhiṭṭhānā kiṃabhinivesā kiṃpariyosānāti brāhmaṇā kho brāhmaṇa Bhogādhippāyā paññūpavicārā mantādhiṭṭhānā yaññābhinivesā brahmalokapariyosānāti. {323.2} Gahapatikā pana bho gotama kimadhippāyā kiṃupavicārā kiṃadhiṭṭhānā kiṃabhinivesā kiṃpariyosānāti gahapatikā kho brāhmaṇa bhogādhippāyā paññūpavicārā sippādhiṭṭhānā kammantābhinivesā niṭṭhitakammantapariyosānāti. {323.3} Itthī pana bho gotama kimadhippāyā kiṃupavicārā kiṃadhiṭṭhānā kiṃabhinivesā kiṃpariyosānāti itthī kho brāhmaṇa purisādhippāyā alaṅkārūpavicārā puttādhiṭṭhānā asapatiabhinivesā 1- issariyapariyosānāti. {323.4} Corā pana bho gotama kimadhippāyā kiṃupavicārā kiṃadhiṭṭhānā kiṃabhinivesā kiṃpariyosānāti corā kho brāhmaṇa ādānādhippāyā gahaṇūpavicārā satthādhiṭṭhānā andhakārābhinivesā adassanapariyosānāti. {323.5} Samaṇā pana bho gotama kimadhippāyā kiṃupavicārā kiṃadhiṭṭhānā kiṃabhinivesā kiṃpariyosānāti samaṇā kho brāhmaṇa khantisoraccādhippāyā paññūpavicārā sīlādhiṭṭhānā akiñcanābhinivesā 2- nibbānapariyosānāti. {323.6} Acchariyaṃ bho gotama abbhutaṃ bho gotama khattiyānampi bhavaṃ gotamo jānāti adhippāyañca upavicārañca adhiṭṭhānañca abhinivesañca pariyosānañca brāhmaṇānampi bhavaṃ gotamo jānāti .pe. Gahapatikānampi 3- bhavaṃ gotamo jānāti itthīnampi bhavaṃ gotamo jānāti @Footnote: 1 Po. Ma. asapatībhinivesā . 2 Ma. Yu. ākiñcaññābhinivesā . 3 Ma. gahapatīnampi. Corānampi bhavaṃ gotamo jānāti samaṇānampi bhavaṃ gotamo jānāti adhippāyañca upavicārañca adhiṭṭhānañca abhinivesañca pariyosānañca . Abhikkantaṃ bho gotama .pe. upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatanti.