คยาสูตร

4. Gayāsīsasuttavaṇṇanā

Catutthe etadavocāti attano padhānabhūmiyaṃ uppannaṃ vitakkaṃ bhikkhusaṃghassa ārocetuṃ etaṃ "pubbāhaṃ bhikkhave"ti ādivacanaṃ avoca. Obhāsanti dibbacakkhuñāṇobhāsaṃ. Ñāṇadassananti dibbacakkhubhūtañāṇasaṅkhātaṃ dassanaṃ. Sannivutthapubbanti ekato vasitapubbaṃ. Imasmiṃ pana sutte dibbacakkhuñāṇaṃ iddhavidhañāṇaṃ cetopariyañāṇaṃ yathākammūpagañāṇaṃ anāgataṃsañāṇaṃ paccuppannaṃsañāṇaṃ atītaṃsañāṇaṃ pubbenivāsañāṇanti iminā tāva aṭṭha ñāṇāni pāliyaṃyeva āgatāni, tehi pana saddhiṃ vipassanāñāṇāni cattāri maggañāṇāni cattāri phalañāṇāni cattāri paccavekkhaṇañāṇāni cattāri paṭisambhidāñāṇāni cha asādhāraṇañāṇānīti etāni ñāṇāni samodhānetvā kathentena evaṃ idaṃ suttaṃ kathitaṃ nāma hoti.