พระสูตรที่ไม่สงเคราะห์ด้วยปัณณาสก์

นิคมนกถา

เอตฺตาวตา จ:-

อายาจิโต สุมตินา เถเรน ภทนฺตโชติปาเลน

กญฺจิปุราทีสุ มยา ปุพฺเพ สทฺธึ วสนฺเตน.

วรตมฺพปณฺณิทีเป มหาวิหารมฺปิ วสนกาเลปิ

วาตหเต วิย ๑- ทุเม วลญฺชมานมฺหิ สทฺธมฺเม.

ปารํ ปิฏกตฺตยสาครสฺส คนฺตฺวา ฐิเตน สุมตินา

ปริสุทฺธาชีเวนาภิยาจิโตปิ ชีวเกนาปิ.

ธมฺมกถานยนิปุเณหิ ธมฺมกถิเกหิ อปริมาเณหิ,

๒- (ปริกิฬิตปริปชฺชิตสฺส สมายจิตฺรสฺส.

อฏฺฐกถํ องฺคุตฺตรมหานิกายสฺส กาตุมารทฺโธ) ๒-

ยมหํ จิรกาลฏฺฐิติมิจฺฉนฺโต สาสนวรสฺส.

สา หิ มหาอฏฺฐกถาย สารมาทาย นิฏฺฐิตา เอสา

จตุนวุติปฺปริมาณาย ปาลิยา ภาณวาเรหิ.

สพฺพาคมสํวณฺณนมโนรโถ ปูริโต จ เม ยสฺมา

เอตาย มโนรถปูรณีติ นามํ ตโต อสฺสา.

เอกูนสฏฺฐิมตฺโต วิสุทฺธิมคฺโคปิ ภาณวาเรหิ

อตฺถปฺปกาสนตฺถาย อาคมานํ กโต ยสฺมา.

ตสฺมา เตน สหายํ คาถาคณนานเยน อฏฺฐกถา

ตีหาธิกทิยฑฺฒสตํ วิญฺเญยฺยา ภาณวารานํ.

ตีหาธิกทิยฑฺฒสตปฺมาณมิติ ภาณวารโต เอสา

สมยํ ปกาสยนฺตี มหาวิหาราธิวาสีนํ.

มูลฏฺฐกถาสารํ อาทาย มยา อิมํ กโรนฺเตน

ยํ ปุญฺญมุปจิตํ โหตุ โลโก สทา สุขิโตติ. ๓-

@เชิงอรรถ: ๑ ฉ.ม. วากํ คเต วิย ๒-๒ ฉ.ม. อิเม ปาฐา น ทิสฺสนฺติ

@๓ สี. เตน สพฺพโลโก สุขี โหตูติ, ก. เตน สพฺโพ สุขี โลโกติ

ปรมสุวิสุทฺธสทฺธาพุทฺธิวิริยปฏิมณฺฑิเตน สีลาจารชฺชวมทฺทวตาทิ- คุณสมุทยสมุทิเตน สกสมยสมยนฺตรคหนชฺโฌคาหนสมตฺเถน ปญฺญาเวยฺยตฺติยสมนฺนาคเตน ติปิฏกปริยตฺติปฺปเภเท สาฏฺฐกเถ สตฺถุสาสเน อปฺปฏิหตญาณปฺปภาเวน มหาเวยฺยา- กรเณน กรณสมฺปตฺติชนิตสุขวินิคฺคตมธุโรฬารวจนวณฺณยุตฺเตน ยุตฺตมุตฺตวาทินา วา ทิวเรน มหากวินา ปภินฺนปฏิสมฺภิทาปริวาเร ฉฬภิญฺญาทิปฺปเภทคุณปฏิมณฺฑิเต อุตฺตริมนุสฺสธมฺเม สุปฺปติฏฺฐิตพุทฺธีนํ เถรานํ เถรวํสปฺปทีปานํ มหาวิหารวาสีนํ วํสาลงฺการภูเตน สุวิปุลวิสุทฺธพุทฺธินา พุทฺธโฆโสติ ครูหิ กตนามเธยฺเยน เถเรน กตา อยํ มโนรถปูรณี นาม องฺคุตฺตรนิกายฏฺฐกถา:-

ตาว ติฏฺฐตุ โลกสฺมึ โลกนิตฺถรเณสินํ

ทสฺเสติ กุลปุตฺตานํ นยํ จิตฺตวิสุทฺธิยา.

ยาว พุทฺโธติ นามมฺปิ สุทฺธจิตฺตสฺส ตาทิโน

โลกมฺหิ โลกเชฏฺฐสฺส ปวตฺตติ มเหสิโนติ.

มโนรถปูรณี นาม

องฺคุตฺตรนิกายฏฺฐกถา สพฺพากาเรน นิฏฺฐิตา.