พระสูตรที่ไม่สงเคราะห์ด้วยปัณณาสก์

Nigamanakathā

ettāvatā ca:-

āyācito sumatinā therena bhadantajotipālena

kañcipurādīsu mayā pubbe saddhiṃ vasantena.

Varatambapaṇṇidīpe mahāvihārampi vasanakālepi

vātahate viya 1- dume valañjamānamhi saddhamme.

Pāraṃ piṭakattayasāgarassa gantvā ṭhitena sumatinā

parisuddhājīvenābhiyācitopi jīvakenāpi.

Dhammakathānayanipuṇehi dhammakathikehi aparimāṇehi,

2- (parikiḷitaparipajjitassa samāyacitrassa.

Aṭṭhakathaṃ aṅguttaramahānikāyassa kātumāraddho) 2-

yamahaṃ cirakālaṭṭhitimicchanto sāsanavarassa.

Sā hi mahāaṭṭhakathāya sāramādāya niṭṭhitā esā

catunavutipparimāṇāya pāliyā bhāṇavārehi.

Sabbāgamasaṃvaṇṇanamanoratho pūrito ca me yasmā

etāya manorathapūraṇīti nāmaṃ tato assā.

Ekūnasaṭṭhimatto visuddhimaggopi bhāṇavārehi

atthappakāsanatthāya āgamānaṃ kato yasmā.

Tasmā tena sahāyaṃ gāthāgaṇanānayena aṭṭhakathā

tīhādhikadiyaḍḍhasataṃ viññeyyā bhāṇavārānaṃ.

Tīhādhikadiyaḍḍhasatapmāṇamiti bhāṇavārato esā

samayaṃ pakāsayantī mahāvihārādhivāsīnaṃ.

Mūlaṭṭhakathāsāraṃ ādāya mayā imaṃ karontena

yaṃ puññamupacitaṃ hotu loko sadā sukhitoti. 3-

@Footnote: 1 cha.Ma. vākaṃ gate viya 2-2 cha.Ma. ime pāṭhā na dissanti

@3 Sī. tena sabbaloko sukhī hotūti, ka. tena sabbo sukhī lokoti

Paramasuvisuddhasaddhābuddhiviriyapaṭimaṇḍitena sīlācārajjavamaddavatādi- guṇasamudayasamuditena sakasamayasamayantaragahanajjhogāhanasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyā- karaṇena karaṇasampattijanitasukhaviniggatamadhuroḷāravacanavaṇṇayuttena yuttamuttavādinā vā divarena mahākavinā pabhinnapaṭisambhidāparivāre chaḷabhiññādippabhedaguṇapaṭimaṇḍite uttarimanussadhamme suppatiṭṭhitabuddhīnaṃ therānaṃ theravaṃsappadīpānaṃ mahāvihāravāsīnaṃ vaṃsālaṅkārabhūtena suvipulavisuddhabuddhinā buddhaghosoti garūhi katanāmadheyyena therena katā ayaṃ manorathapūraṇī nāma aṅguttaranikāyaṭṭhakathā:-

tāva tiṭṭhatu lokasmiṃ lokanittharaṇesinaṃ

dasseti kulaputtānaṃ nayaṃ cittavisuddhiyā.

Yāva buddhoti nāmampi suddhacittassa tādino

lokamhi lokajeṭṭhassa pavattati mahesinoti.

Manorathapūraṇī nāma

aṅguttaranikāyaṭṭhakathā sabbākārena niṭṭhitā.