๑๒. ภัทราวุธปัญหา

12. Bhadrāvudhasuttavaṇṇanā

[1108-9] Okañjahanti bhadrāvudhasuttaṃ. Tattha okañjahanti ālayaṃ jahaṃ. Taṇhacchidanti chataṇhākāyacchidaṃ. Anejanti lokadhammesu nikkampaṃ. Nandiñjahanti anāgatarūpādipatthanāpajahaṃ ekā eva hi taṇhā thutivasena idha nānappakārato vuttā. Kappañjahanti duvidhakappañjahaṃ. Abhiyāceti ativiya yācāmi. Sutvāna Nāgassa apanamissanti itoti nāgassa tava bhagavā vacanaṃ sutvā ito pāsāṇakacetiyato bahū janā pakkamissantīti adhippāyo. Janapadehi saṅgatāti aṅgādīhi janapadehi idha samāgatā. Viyākarohīti dhammaṃ desehi.

Athassa āsayānulomena dhammaṃ desento bhagavā dve gāthāyo abhāsi. Tattha ādānataṇhanti rūpādīnaṃ ādāyikaṃ gahaṇataṇhaṃ, taṇhūpādānanti vuttaṃ hoti. Yaṃ yañhi lokasmimupādiyantīti etesu khandhādibhedesu 1- yaṃ yaṃ gaṇhanti. Teneva māro anveti jantunti teneva upādānappaccayanibbatta- kammābhisaṅkhāravasena 2- paṭisandhikkhandhamāro taṃ sattaṃ anugacchati.

Tasmā pajānanti tasmā etamādīnavaṃ aniccādivasena vā saṅkhāre jānanto. Ādānasatte iti pekkhamāno, pajaṃ imaṃ maccudheyye visattanti ādātabbaṭṭhena ādānesu rūpādīsu satte sabbaloke imaṃ pajaṃ maccudheyye laggaṃ pekkhamāno, ādānasatte vā ādānābhiniviṭṭhe puggale ādānasaṅgahetuñca imaṃ pajaṃ maccudheyye laggaṃ tato vītikkamituṃ asamatthaṃ iti pekkhamāno kiñcanaṃ sabbaloke na upādiyethāti. Sesaṃ sabbattha pākaṭameva.

Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.

Paramatthajotikāya khuddakaṭṭhakathāya

suttanipātaṭṭhakathāya

bhadrāvudhasuttavaṇṇanā niṭṭhitā.

@Footnote: 1 cha.Ma.,i. uddhādibhedesu 2 cha.Ma.,i.....kammābhisaṅkhāranibbattavasena