๑๓. อุพพรีเปตวัตถุ

|110.351| 13 Ahu rājā brahmadatto pañcālānaṃ rathesabho ahorattānamaccayā rājā kālamakrubbatha 2- . |110.352| Tassa āḷāhanaṃ gantvā bhariyā kandati ubbarī brahmadattaṃ apassantī brahmadattāti kandati. |110.353| Isi ca tattha āgacchi sampannacaraṇamuni so ca tattha apucchittha ye tattha su samāgatā |110.354| kassa cidaṃ āḷāhanaṃ nānāgandhasameritaṃ kassāyaṃ kandati bhariyā ito dūragataṃ patiṃ brahmadattaṃ apassantī brahmadattāti kandati. |110.355| Te ca tattha viyākaṃsu ye tattha su samāgatā brahmadattassa bhadante brahmadattassa mārisa @Footnote: 1 Yu. bhutvā . 2 Sī. Yu. kālaṃ kari tadā. |110.356| Tassa idaṃ āḷāhanaṃ nānāgandhasameritaṃ tassāyaṃ kandati bhariyā ito dūragataṃ patiṃ brahmadattaṃ apassantī brahmadattāti kandatīti. |110.357| Chaḷāsītisahassāni brahmadattassa nāmakā imasmiṃ āḷāhane daḍḍhā tesaṃ kaṃ anusocasīti. |110.358| Yo rājā cūḷanīputto pañcālānaṃ rathesabho taṃ bhante anusocāmi bhattāraṃ sabbakāmadanti. |110.359| Sabbevahesuṃ rājāno brahmadattassa nāmakā sabbeva cūḷanīputtā pañcālānaṃ rathesabhā |110.360| sabbesaṃ anupubbena mahesittaṃ akārayi kasmā purimake hitvā pacchimaṃ anusocasīti. |110.361| Ātume itthibhūtāya dīgharattāya mārisa yassā me itthibhūtāya saṃsāre bahu bhāsasīti. |110.362| Ahu itthī ahu puriso pasuyoniṃpi 1- āgamā evametaṃ atītānaṃ pariyanto na dissatīti. |110.363| Ādittaṃ vata maṃ santaṃ ghatasittaṃva pāvakaṃ vārinā viya osiñcaṃ sabbaṃ nibbāpaye daraṃ |110.364| abbūḷhi 2- vata me sallaṃ sokaṃ hadayanissitaṃ yo me sokaparetāya patisokaṃ apānudi. @Footnote: 1 Yu. pasuṃ yoniṃpi agamā . 2 Ma. abḷahī . Yu. abbūḷhaṃ. |110.365| Sāhaṃ abbūḷhasallāsmi sītibhūtāsmi nibbutā na socāmi na rodāmi tava sutvā mahāmunīti. |110.366| Tassa taṃ vacanaṃ sutvā samaṇassa subhāsitaṃ pattacīvaramādāya pabbaji anagāriyaṃ |110.367| sā ca pabbajitā santā agārasmā anagāriyaṃ mettaṃ cittaṃ abhāvesi brahmalokupapattiyā |110.368| gāmā gāmaṃ vicarantī nigame rājadhāniyo. Uruvelaṃ 1- nāma so gāmo yattha kālamakrubbatha |110.369| mettacittaṃ ābhāvetvā 2- brahmalokupapattiyā itthīcittaṃ virājetvā brahmalokupagā ahūti. Ubbarīpetavatthu terasamaṃ. Uddānaṃ. Paṇḍumātā 3- patiyā ca nandi kuṇḍalinā ghato dveseṭṭhī tantavāyo 4- vihārasuttasovānaubbarīti 5- . Ubbarīvaggo dutiyo. -------------